Tramp Qytaıdy saýda kelisimin buzdy dep aıyptady

ASTANA. KAZINFORM – AQSh prezıdenti Donald Tramp Qytaıdy Vashıngtonmen jasalǵan saýda kelisimin buzdy dep aıyptady, dep habarlaıdy Anadoly. 

 Bul týraly Aq úı basshysy Truth Social platformasyndaǵy paraqshasynda jazdy.

AQSh kóshbasshysy eki apta buryn Qytaı kúrdeli ekonomıkalyq qaýip-qaterge tap bolǵanyn atap ótti. Sebebi Pekın engizgen óte joǵary kedendik tarıfter Qytaı úshin AQSh naryǵynda saýda júrgizýdi is júzinde múmkin emes etken. Al AQSh naryǵy, sózsiz, álemdegi birinshi naryq bolyp sanalady.

— Biz Qytaımen qyrǵı-qabaq soǵysqa kirdik, bul olar úshin joıqyn boldy. Kóptegen zaýyt jabylyp, «azamattyq tolqýlar» boldy. Men ne bolǵanyn kórdim, bul maǵan unaǵan joq, olarǵa unamady, bizge emes, — dep jalǵastyrdy Tramp.

Tramptyń aıtýynsha, keıin ol Qytaıdy óte aýyr jaǵdaıdan qutqarý úshin Pekınmen jedel kelisim jasaǵan.

— Men ondaı jaǵdaıdyń bolǵanyn qalamadym. Bul kelisimniń arqasynda bári tez turaqtalyp, Qytaı qalypty bızneske qaıta oraldy. Barlyǵy rıza boldy. Bul — jaqsy jańalyq. Biraq Qytaı, keıbireýler úshin bul tańǵalarlyq bolmasa da, bizben jasalǵan kelisimdi tolyǵymen buzdy, — dedi AQSh prezıdenti.

Ýaqytsha tarıfterdi tómendetý týraly kelisim

AQSh pen Qytaı arasyndaǵy saýda shıelenisinen keıin Tramp Qytaıdan keletin taýarlarǵa kedendik alymdardy 145%-ǵa deıin kóterdi. Al Qytaı, jaýap retinde, AQSh taýarlaryna tarıfti 125%-ǵa deıin ulǵaıtty.

Bıylǵy mamyrda Shveıtsarııada ótken saýda kelissózderinen keıin taraptar ózara kedendik tarıfterdi ýaqytsha tómendetýge kelisti.

Kelisim aıasynda, 14 mamyrdan bastap, AQSh Qytaı taýarlaryna tarıfterdi 145%-dan 30%-ǵa deıin tómendetedi (90 kúnge), al Qytaı amerıkalyq ónimderge salynatyn alymdy 125%-dan 10%-ǵa deıin azaıtady.

Sondaı-aq Qytaı men AQSh arasyndaǵy saýda jáne ekonomıkalyq qatynastar jónindegi kelissózderdi jalǵastyrý úshin arnaıy tetik qurylatyny habarlandy. 

Aıta ketelik Tramp AQSh bolat ımportyna baj salyǵyn 25%-dan 50%-ǵa deıin eki ese arttyratynyn málimdedi.