Tramp Iranǵa qatysty sheshim qabyldaıdy

ASTANA. KAZINFORM – AQSh prezıdenti Donald Tramp beısenbi kúni Qurama Shtattardyń «aldaǵy eki apta ishinde» Iranǵa shabýyl jasaý máselesin sheshetinin málimdedi, dep habarlaıdy The New York Times. 

AQSh prezıdenti amerıkalyq soqqy sózsiz bolýy múmkin degen sońǵy pikirlerinen alystap, Irannyń bolashaq ıadrolyq baǵdarlamasy boıynsha kelissózdi qaıta bastaý múmkindigin arttyrdy.

Aq úıdiń málimdeýinshe, «Iranmen taıaý bolashaqta ótýi nemese ótpeýi múmkin kelissózdiń úlken yqtımaldyǵy bar».

Tramp birneshe kún boıy amerıkalyq kúshterge Irannyń ıadrolyq nysandaryn bombalaýdy buıyrý týraly kópshilik aldynda oıyn bildirip, bul rette kelissóz ótkizýge áli de kesh emes ekenin aıtty. Beısenbidegi túsiniktemelerimen ol ózine kóptegen jańa dıplomatııalyq, áskerı jáne jasyryn nusqalardy bere alatyn tynyǵý alyp jatqan sııaqty.

Ulybrıtanııa Syrtqy ister mınıstri Devıd Lemmı Iranǵa qatysty jaǵdaıdyń «qaýipti» kúıinde qalyp otyrǵanyn, biraq «qazir aldaǵy eki apta ishinde dıplomatııalyq sheshimge kelý múmkindigi bar» ekenin málimdedi. Ol bul pikirin Aq úıde Memlekettik hatshy Marko Rýbıomen jáne Tramptyń Taıaý Shyǵystaǵy arnaıy ókili Stıv Ýıtkofpen kezdeskennen keıin aıtty.

Buǵan deıin Izraıl AQSh-ty Iranmen soǵysýǵa shaqyrǵanyn jazǵan bolatynbyz. 

Brıtandyq barlaý qyzmetiniń burynǵy basshysy AQSh-tyń Iranǵa qatysty josparyn baǵalady.