Tramp ımporttyq bajdardy joıdy: bul AQSh-taǵy baǵalarǵa qalaı áser etedi

ASTANA. KAZINFORM — AQSh prezıdenti Donald Tramp kofe, sıyr eti, banan, apelsın shyryny sııaqty 200-den astam ónimge salynǵan ımporttyq bajdardy alyp tastaý týraly sheshim qabyldady. Bul qadam AQSh-ta baǵanyń ósýine qatysty alańdaýshylyq kúsheıgen soń jasaldy, dep habarlaıdy DW.

Buǵan deıin Tramp engizilgen bajdar ınflıatsııaǵa áser etpeıdi dep málimdegen edi. Alaıda 14 qarashada Air Force One bortynda jýrnalısterdiń suraǵyna jaýap bere otyryp, keı jaǵdaılarda bajdar shynymen de baǵanyń qymbattaýyna yqpal etýi múmkin ekenin moıyndady. Soǵan qaramastan, onyń aıtýynsha, AQSh-ta «aıtarlyqtaı ınflıatsııa joq».

Prezıdent sondaı-aq kelesi jyldyń ishinde tabysy tómen jáne ortasha deńgeıdegi árbir amerıkalyqqa bajdardan túsken qarjy esebinen 2 myń dollar tóleýdi josparlap otyrǵanyn rastady. Joǵary tabysy bar azamattarǵa bul tólem qarastyrylmaıdy.

Buǵan deıin, tamyz aıynda, AQSh Qarjy mınıstrligi eldiń memlekettik qaryzy alǵash ret 37 trln dollardan asqanyn habarlaǵan. Qazan aıynda Halyqaralyq valıýta qory qazirgi bıýdjet saıasaty saqtalǵan jaǵdaıda, 2030 jylǵa qaraı qaryz kólemi ІJÓ-niń 143,4% jetýi múmkin ekenin málimdedi. Bıylǵy kórsetkish shamamen 125% deńgeıinde.

Eske salsaq, 2 sáýirde Tramp 185 el men aýmaqtan keletin ónimderge kedendik tarıfter engizetinin jarııalaǵan edi. Ámbebap 10% tarıf 5 sáýirden, jeke tarıfter 9 sáýirden bastap kúshine endi.

Sol kúni AQSh prezıdenti birqatar qarsy shara retinde engizilgen bajdardyń 90 kúnge toqtatylatynyn habarlady. Aq úıdiń túsindirýinshe, bul — saýda konsýltatsııalarynyń júrgizilýimen baılanysty. Osy kezeńde ámbebap 10% tarıf qoldanylady.

Al Qazaqstan Respýblıkasy Saýda jáne ıntegratsııa mınıstrliginiń AQSh-tyń birqatar taýarǵa jańa kedendik bajdar engizýine qatysty málimdemesi jarııalandy.