Tramp Alıaskada mys pen myrysh óndirisin ulǵaıtýdy maquldady
ASTANA. KAZINFORM — AQSh prezıdenti Donald Tramp mys, kobalt, altyn jáne basqa da paıdaly qazbalardy óndirisin qamtamasyz etý úshin Alıaskadaǵy qý dala arqyly ótetin 211 mıl jol qurylysyn maquldaýǵa buıryq berdi, dep habarlaıdy ABC News.
— Alıaska shtatyndaǵy Ferbenks qalasynan soltústikke qaraı qıyrshyq tas jol jáne paıdaly qazbalardy óndirý jobasy bizdiń elimizge baıaǵydan-aq mıllıardtaǵan dollar ákelip, bizdi mol energııa men mıneraldarmen qamtamasyz etýi kerek edi, — dedi Donald Tramp.
Jobany qoldaýshylar, onyń ishinde Alıaskanyń Kongrestegi delegatsııasy bul jol quny 7 mlrd dollardan asatyn iri mys ken ornyna jetý úshin qajet ekenin málimdedi. Mys avtomobıl, elektronıka, tipti jel týrbınalary sııaqty jańartylatyn energııa tehnologııalaryn óndirýde qoldanylady.
Embler joly qurylysynyń jobasy Tramptyń birinshi ákimshiligi kezinde maquldandy, biraq keıinirek jobanyń karıbý (buǵy tektiler) men basqa jabaıy janýarlarǵa qaýip tóndiretini, sondaı-aq Alıaskada ańshylyq men balyqshylyqpen aınalysatyn baıyrǵy taıpalaryna zııan tıgizetini anyqtalǵannan keıin Baıden ákimshiligi ony buǵattap tastady.
Qurylysqa qarsy shyqqandar, sonyń ishinde federaldy deńgeıde moıyndalǵan 40 taıpadan turatyn konsortsıým jol qurylysy dástúrli ómir saltyna qaýip tóndirýi múmkin dep alańdap otyr, óıtkeni bul jerlerde aqserke men buǵylar mekendeıdi.
Uzaqtyǵy shamamen 42 shaqyrym bolatyn eki jolaqty qıyrshyq tas jol Geıts-of-Arktık ulttyq parki men qoryǵy arqyly ótedi, sol úshin federaldy úkimettiń ruqsaty qajet. Jol sondaı-aq bolashaq ken ornyna jetkenshe 11 ózen men myńdaǵan bulaqty kesip ótedi.
Tramp buıryǵynda AQSh-tyń ishki resýrstarǵa degen qajettiligin eskere otyryp usynylǵan joldyń qoǵam múddesi úshin qajet ekeni jáne ekonomıkalyq turǵydan múmkin bolatyn balama joldyń joqtyǵy aıtylǵan.
Sheshim federaldy jer resýrstaryn basqarý bıýrosyna, Ulttyq saıabaq qyzmetine jáne AQSh armııasynyń Injenerlik korpýsyna jol qurylysyna qajetti ruqsattardy qaıta berýge nusqaý berip otyr.
Buǵan deıin Tramp AQSh-taǵy sırek jer metaldaryn óndirýge ınvestıtsııa salatynyn habarlaǵan bolatynbyz.