Tramp AQSh pen Qytaıdyń tyǵyz yntymaqtasatynyn málimdedi

ASTANA. KAZINFORM – AQSh prezıdenti Qurama Shtattar men Qytaı arasyndaǵy kelisim jasalǵanyn rastady. Bul kelisimge AQSh pen Qytaı kóshbasshylarynyń sońǵy maquldaýy qajet, dep habarlaıdy  Kazinform agenttiginiń menshikti tilshisi. 

– Sı Tszınpın ekeýimiz Qytaıdy amerıkalyq saýda úshin ashý maqsatynda tyǵyz yntymaqtastyq ornatýǵa nıettimiz. Bul eki el úshin de úlken jeńis bolar edi,  – dep jazdy Donald Tramp Truth Social jelisinde.

AQSh prezıdenti «Qytaımen jasalǵan kelisimimiz aıaqtaldy, endi ol QHR tóraǵasy Sı Tszınpın men meniń sońǵy maquldaýyma jatady» dep rastady.

AQSh prezıdentiniń aıtýynsha, Qytaı saýda kelisimi aıasynda sırek kezdesetin metaldardy AQSh-qa aldyn ala jetkizetin bolady.

Álemniń eń iri eki ekonomıkasy arasyndaǵy qarym-qatynastar «keremet» dep atap ótti Tramp Truth Social-daǵy jazbasynda. Ol «Biz kedendik alymdardyń 55 paıyzyn alamyz, Qytaı – 10 paıyzyn» dep qosty dep atap ótti.

AQSh belgili bir jeńildikterge barady – mysaly, qytaılyq stýdentterge amerıkalyq kolledjder men ýnıversıtetterde oqýǵa ruqsat beredi. 

Buǵan deıin Londonda ótken eki kúndik kelissózderdiń nátıjesinde AQSh pen Qytaı ókilderi Jeneva saýda kelisimin júzege asyrýdyń negizderin keliskeni habarlanǵan bolatyn.