Tramp ákimshiligi Garvardtan sheteldik stýdentterdi qabyldaý quqyǵyn alyp qoımaq

ASTANA. KAZINFORM – AQSh-tyń Іshki qaýipsizdik mınıstrligi ýnıversıtetten 30 sáýirge deıin Garvardta vızamen oqıtyn stýdentterdiń «zańsyzdyqtary men zorlyq-zombylyq áreketteri» týraly búge-shigesine deıin túsirilgen «jazbalardy» jetkizýdi talap etti, dep jazdy BBC.

Olaı bolmaǵan jaǵdaıda Garvard sheteldik stýdentterdi qabyldaý quqyǵynan aıyrylady.

Garvard ókilderi CNN-ge ózderine qoıylǵan talap týraly biletinderin, degenmen osyǵan deıingi ustanymdarynda ekenin jetkizgen, ıaǵnı ýnıversıtet óziniń táýelsizdigin qurbandyqqa shalyp, konstıtýtsııalyq quqyqtarynan bas tartpaıdy.

AQSh-ta bilim alǵysy keletin sheteldikter F nemese M sanatyndaǵy vızany alýy kerek. Stýdentter men almastyrý baǵdarlamasynyń qatysýshylaryn (SEVP) qabyldaýǵa sertıfıkat alǵan oqý oryndary ǵana vızaǵa qajetti qujattardy bere alady.

Іshki qaýipsizdik mınıstrligi SEVP baǵdarlamasyn baqylaıdy jáne ol oqý ornynyń sertıfıkatyn alyp qoıa alady.

2024-2025 oqý jylynda Garvardta 6793 sheteldik stýdent bilim alǵan. Bul bilim alyp jatqandardyń 27% ǵana jáne ol 2006 jyldan bergi eń joǵarǵy kórsetkish.

Stýdenttik Harvard Crimson basylymynyń málimetterinshe, ýnıversıtet Donald Tramp ákimshiligimen janjaldasqaly tek 12 stýdent pen jaqynda ǵana oqý bitirgen túlektiń vızasy qaıtaryldy.

Osyǵan deıin biz AQSh Garvard-qa bólinetin 2,2 mıllıard dollar memlekettik qarjylandyrýdy toqtatatyny týraly jazdyq.