Tramp ákimshiligi federaldyq qyzmetkerlerdi jumystan shyǵara bastady

ASTANA. KAZINFORM — AQSh Aq úıindegi Basqarý jáne bıýdjet basqarmasynyń (OMB) dırektory Rassel Voýt bıýdjet daýyna baılanysty, úkimettiń jabyq kúıinde qalýy nátıjesinde federaldyq qyzmetkerler jumystan shyǵa bastaǵanyn habarlady.

Bul týraly Voýt amerıkandyq X áleýmettik jelisindegi akkaýntynda habarlady.

OMB dırektory Rassel Voýt óziniń jazbasynda: «Qyzmetkerlerdi qysqartý bastaldy» dep jazdy.

Ótken aptada AQSh prezıdenti Donald Tramp Voýtpen kezdesip, qaı federaldyq mekemelerde jumystan qysqartýlar júrgiziletinin anyqtaıtynyn málimdegen.

AQSh-ta 2025 qarjy jyly seısenbi, 30 qyrkúıekte tún ortasynda aıaqtaldy, al Kongrestiń ýaqytsha bıýdjetti bekitpeýine baılanysty federaldyq úkimet jabyldy.

Kongrestiń ýaqytsha bıýdjetti bekitpeýinen týyndaǵan jumys toqtaýy saldarynan kóptegen federaldyq qyzmetkerler demalysqa jiberildi.

Qarjylandyrýdyń bolmaýynan federaldyq úkimettiń jumysy on kúnge toqtap turǵan AQSh-ta respýblıkalyqtar men demokrattar ýaqytsha bıýdjet týraly kelisimge kele almaı otyr.

Vashıngtondaǵy bıýdjet daýy sozylyp jatqanda, keshe Senatta jetinshi daýys berý barysynda respýblıkalyqtar men demokrattardyń ýaqytsha bıýdjet jobalary qajetti daýystardy ala almady.

Budan buryn AQSh prezıdenti Donald Tramp ózi qolǵa alǵan memlekettik bıýrokratııamen kúres jumystary aıasynda jeti federaldyq agenttikte shtat sanyn aıtaralyqtaı qysqartýǵa buıryq berdi.