Tórtinshi kún: Sıan-Almaty velosherýine qatysýshylar Gansý provıntsııasyna keldi

GANЬSÝ. QazAqparat - Tórtinshi kúni «Sıan-Almaty» velosherýine qatysýshylar Kýnmın taý asýlarynan ótip, Shensı provıntsııasynyń shekarasynan ótip, Gansý provıntsııasyna keldi, dep habarlaıdy QazAqparat.

Bir kún buryn veloshabandozdar Uly Jibek jolyndaǵy kóne qalalardyń biri jáne álemdegi tıtan ónerkásibin damytýdyń zamanaýı ortalyǵy sanalatyn kóne Baodzı qalasyn basyp ótti. Qytaıdyń óz «Tıtan alqaby» bar, onda 900-den astam kásiporyn jumys isteıdi.

Sondaı-aq, Baodzıde álemdegi eń úlken qola murajaıy bar, ony bizdiń veloshabandozdar tańerteń tamashalady. Tańerteńgilik salqynmen sportshylar murajaıdy aralap bolǵan soń, Gansý provıntsııasy ornalasqan Kýnmın taý asýlaryn baǵyndyrýǵa attandy.

Bul taýly aımaqta qytaılyq jol qurylysshylary júzdegen týnnel qazǵan, al eń uzyny - 32 shaqyrym. Osy taý asýlaryn týnnelderdiń eń kúrdeli jelilerimen kesip ótip, Qytaı tabıǵı taý landshaftyn, sondaı-aq osy jerlerdiń florasy men faýnasyn saqtap qaldy. Ádemi taý peızajy, tarıhı eskertkishter men ejelgi Jibek jolynyń jádigerleri dostyq pen beıbitshilik velosherýine qatysýshylarymyzdy az ýaqyttyń ishinde tańǵaldyrdy. Olardyń aldynda áli 3000 shaqyrymnan astam jol bar, onyń bir bóligi Gansý ólkesiniń sazdy dalalary men ańǵarlary, Shyńjańnyń qurǵaq jáne jansyz shólderi arqyly ótedi.

«Sıan-Almaty» dostyq pen beıbitshilik tarıhı velosherýine qatysýshylarǵa kúsh-qýat, densaýlyq jáne tózimdilik tileı otyryp, olardy Qazaqstanda kútemiz.