Tórt myńnan astam sarbaz Otanǵa adal bolýǵa ant berdi
ASTANA. KAZINFORM — Saltanatty is-sharalar Taraz, Gvardeısk, Jarkent, Abaı, Aqtaý, Atyraý, Beıneý jáne Aqtóbe garnızondaryndaǵy «Ońtústik», «Shyǵys» jáne «Batys» óńirlik qolbasshylyqtarynyń 19 áskerı bóliminde ótti. Bul týraly Qorǵanys mınıstrligi málim etti.
Osy aıtýly kúni jas sarbazdardy qoldaýǵa qolbasshylyq ókilderi, Qarýly kúshterdiń ardagerleri, jaýyngerlerdiń jaqyndary keldi.
Sarbazdar jas jaýynger kýrsy barysynda ásker tártibine beıimdelip, jalpy áskerı jarǵylardy oqyp, qarý-jaraqpen jumys isteý negizderin meńgerdi jáne jaýyngerlik daıyndyqtyń bastapqy daǵdylaryn úırendi.
Astanada merzimdi qyzmettegi áskerı qyzmetshilerdiń saltanatty áskerı ant qabyldaý rásimi «Otan Ana» monýmentiniń janynda ótti. Munda 68665 áskerı bóliminiń 137 sarbazy Otanǵa adal bolýǵa ant berdi.
Saltanatty rásim bastalǵanǵa deıin basshylyq, qadirli qonaqtar men áskerı qyzmetshiler eskertkishke gúl shoqtaryn qoıyp, el úshin qaza tapqan batyrlarǵa qurmet kórsetti.
Arnaıy operatsııalar kúshteri qolbasshysynyń tárbıe jáne ıdeologııalyq jumys jónindegi orynbasary polkovnık Saıat Býrbasov sarbazdardy osyndaı mańyzdy kúnmen quttyqtady.
— Áskerı ant — Otanǵa adal bolýǵa jáne el táýelsizdigin qorǵaýǵa daıyn bolý úshin beriletin sert. Osy kúnnen bastap ar-namysqa tártipke jáne ózara qoldaýǵa negizdelgen úlken jaýyngerlik baýyrlastyqtyń bir bólshegisińder. Sender Otan qorǵaýshy ataǵyn abyroımen alyp júretinderińe senimdimin, — dep atap ótti ol.
Saltanatty rásimge elorda turǵyndary men qonaqtary da kýá boldy. Jınalǵandar memlekettiń táýelsizdigi men qaýipsizdigin qorǵaýdyń abyroıly mindetin atqarýshylarǵa degen maqtanysh pen qurmetti sezinip, saltanatty sharany qyzyǵýshylyqpen tamashalady.
— Men úshin ant berý — ómirimdegi jańa kezeńniń bastalýy. Osy kúnge muqııat daıyndaldyq, qazir el men jerdiń aldynda jaýapkershilikti sezinip otyrmyz. Osy sátten bastap áskerı qyzmetti barynsha abyroımen atqarýǵa, jarǵyny qatań saqtaýǵa jáne antqa adal bolýǵa daıynmyn, — dedi sarbaz Azat Shalabaıuly.
Qoıan-qoltyq urys pen saptyq daıyndyq elementterin kórsetý kezinde jaýyngerlik rýh pen saptyq mashyqty kórsetken áskerı qyzmetshilerdiń qoıylymdary kelýshilerdi tań qaldyrdy.
— Búgin nemeremniń ant bergenin kórip, bir qýanyp qaldym. Árbir otbasy úshin balalarynyń óz eliniń er azamaty, naǵyz qorǵaýshysy bolǵanyn kórý erekshe ári áserli sát, — dedi Almatydan kelgen áskerı qyzmetshilerdiń biriniń ájesi Roza Ámreeva.
Saltanatty is-sharanyń qyzǵan shaǵynda qatysýshylar men kórermenderge jarqyn áser qaldyrǵan drondar shoýy boldy.
Qarýly kúshterde kóktemgi áskerge shaqyrylǵan tórt myńnan astam sarbaz Otanyna adal bolýǵa ant bergenin aıta ketken jón.
Buǵan deıin Memlekettik kúzet qyzmetinde kóktemde shaqyrylǵan sarbazdar ant qabyldaǵan bolatyn.
