Tórt eldiń quqyqqorǵaý qyzmetkerleri sambodan ózara myqtyny anyqtaıdy

ALMATY. QazAqparat – Almatyda sambo kúresinen halyqaralyq týrnır ótedi. Bul týraly Óńirlik kommýnıkatsııalar qyzmeti alańynda «Dınamo» dene shynyqtyrý-sport qoǵamy» qoǵamdyq birlestigi tóraǵasynyń birinshi orynbasary Asqar Omarqulov aıtty, dep habarlaıdy QazAqparat tilshisi.

Jarys «Dınamo-Qazaqstan» dene shynyqtyrý-sport qoǵamynyń 100 jyldyq mereıtoıyna jáne general Rústem Qaıdarovty eske alýǵa arnalǵan.

Spıker atap ótkendeı, týrnır Іshki ister mınıstrligi, «Generaldar keńesi» qoǵamdyq birlestigi, «Dınamo-Qazaqstan» dene shynyqtyrý-sport qoǵamy men QR sambo kúresi federatsııasynyń birlesip, uıymdastyrýymen ótedi.

«Týrnır bıyl besinshi ret uıymdastyrylady. Oǵan Tájikstan, Qyrǵyzstan, Ózbekstan men elimizdiń ár óńirindegi quqyqqorǵaý organdarynyń sportshylary qatysady. Týrnırde birinshi oryn alǵan sportshyǵa «sport sheberi» ataǵy beriledi. Jarys 5-7 mamyr kúnderi Almatyda Armııa ortalyq sport klýbynyń sport kesheninde ótedi», - dedi A.Omarqulov.