Torǵaı dalasynda kerqulandar qaıta mekendeı bastady
ASTANA. KAZINFORM — Qazaqstanǵa byltyr ákelingen jabaıy jylqylar 4 maýsymda tabıǵatqa jiberildi, dep habarlaıdy Orman sharýashylyǵy jáne janýarlar dúnıesi komıteti.
Bul — 2024 jylǵy maýsymda ákelingen alǵashqy 7 kerqulan. Janýarlar bir jyl mamandardyń baqylaýynda jartylaı erikti jaǵdaıda ustalyp, oıdaǵydaı ortaǵa beıimdelip úlgerdi.
Jylqylar Torǵaı dalasyndaǵy -30 °C aıazda alǵashqy qystan aman-esen shyqty, úırendi, veterınarlyq tekserýlerden ótti. Tabıǵatta janýarlardyń qozǵalysyn baqylap otyratyndaı, Ýmbre men Vespe degen eki bıege GPS-qarǵybaý taǵyldy.
«Altyn Dala» memlekettik tabıǵı rezervatynyń ınspektorlary bosatylǵan jylqylardy qorǵaıdy. Mamandar tabıǵı ortada janýarlardyń minez-qulqyn zertteýdi jáne monıtorıngti jalǵastyrady.
— Kerqulandardyń alǵash tobyn Ortalyq Qazaqstannyń jabaıy tabıǵatyna jiberý — túrdi tarıhı mekeninde qalpyna keltirý jobasyn iske asyrýdaǵy mańyzdy qadam. Reıntrodýktsııa ortalyǵynda sátti ótken janýarlardyń jyl boıǵy turmysy — mamandar men mal dárigerleri komandasynyń eńbeginiń nátıjesi, — deıdi ASBK atqarýshy dırektory Vera Voronova.
Osyǵan deıin Arqalyqqa kerqulandardyń jańa toby jetkizilgenin jazdyq.