Tóregeldi Sharmanov kórshi eldiń sútin nelikten almaý kerektigin aıtty
«Bıe sútinen aıran, ıogýrt, balmuzdaq jasaı alamyz jáne bul ónim paıdaly, sebebi olardyń quramynda transmaı qyshqyldary joq. Jylqy sútiniń erekshe qasıetine toqtalsaq, jalpy onda transmaılary bolmaıdy. Sıyrdyń sútiniń óziniń quramynda tabıǵı transmaı qyshqyly bar, onyń densaýlyqqa keltiretin zııany zerttelgen. Sondyqtan bıe sútiniń tabıǵı táttiliginiń arqasynda túrli ónimderdi shyǵarýǵa múmkindik mol»,-dedi Sharmanov «QazAqparat» tilshisine bergen suhbatynda.
Onyń sózine qaraǵanda, búginde asqyndap turǵan aýrýlardyń biri - ol dıabet, qan qysymy dertteri. Osy rette birqatar aýrýlardyń týyndaýyna transmaı qyshqylynyń áseri bar kórinedi.
«Sútti biz kúndelikti paıdalanamyz. Sonymen qatar atap óter taǵy bir jaıt, búginde sıyr súti taza emes. Máselen, reseılik sút ónimderi aldamshy taǵamdar jáne muny Reseı tarapynyń mamandary ózderi de moıyndap otyr. Sondyqtan bul búginde densaýlyqqa qaýip tóndirip turǵany anyq. Osy oraıda halyqqa tek taza ónimderdi usyný alda turǵan úlken mindet»,-dedi T. Sharmanov.
Aıta keteıik, búgin Aqordada QR Memlekettik hatshysy Gúlshara Ábdiqalyqova memlekettik, qoǵamdyq qyzmette sińirgen eńbegi, eldiń áleýmettik-ekonomıkalyq jáne mádenı damýyna qosqan eleýli úlesi úshin ІІІ dárejeli «Barys» ordenin «Qazaq tamaqtaný akademııasy QB» JShS prezıdenti Tóregeldi Sharmanovqa tapsyrǵan bolatyn.
