Tomoterapııa tarıfiniń mólsheri qaıta qaralady — Úkimet basshysy
ASTANA. KAZINFORM — Tomoterapııa tarıfiniń mólsherin qaıta qaralady. Bul týraly Májilis depýtattarynyń saýalyna Premer-mınıstr Oljas Bektenovtiń jaýabynda aıtylǵan.
— Onkologııalyq praktıkada tomoterapııa syzyqtyq údetkishtermen sáýlelendirý sııaqty sáýlelik terapııanyń bir nusqasy sanalady. 2025 jyly tomoterapııa tehnologııasynyń joǵary tehnologııalyq medıtsınalyq kómek ólshemsharttaryna sáıkestigin (qoldanylý uzaqtyǵy (2019 jyldan beri), ádisteme men jabdyqtyń eksklıýzıvtiliginiń bolmaýy) qaıta baǵalaý qorytyndysy boıynsha qyzmet mamandandyrylǵan medıtsınalyq kómekke aýystyryldy jáne tıisinshe emdelgen jaǵdaılarǵa aqy tóleý tarıfteri ózgertildi. Tarıfterdi qalyptastyrý qaǵıdaty patsıentterge kórsetilgen qyzmetter úshin ortasha shyǵystardy óteýdi kózdeıdi, — dedi Úkimet basshysy.
Premer-mınıstrdiń atap ótýinshe, álemde sáýlelik emdeýge aqy tóleý tarıfterin qalyptastyrýdyń biryńǵaı ádistemeleri joq. Árbir el densaýlyq saqtaýdy qarjylandyrý júıesine qaraı óz tásilderin qalyptastyrady.
— Sonymen qatar medıtsınalyq qyzmetterge 2026 jylǵa arnalǵan tarıfterdi qalyptastyrý jónindegi jumys jospary aıasynda tomoterapııa tarıfiniń mólsherin qaıta qaraý kózdelgen. Bul rette tomoterapııa burynǵysynsha tegin medıtsınalyq kómektiń kepildik berilgen kólemi tizbesine kiredi jáne onkologııalyq aýrýlar boıynsha em qabyldap jatqan barlyq patsıent sáýlelik terapııany tolyq kólemde alýdy jalǵastyryp jatyr. Jalpy qabyldanyp jatqan júıeli sharalar medıtsınalyq kómektiń qoljetimdiligin arttyrýǵa baǵyttalǵan, — dedi Oljas Bektenov.
Úkimet basshysynyń jaýabyna qosymsha berilgen anyqtamaǵa sáıkes, elimizde 26 zamanaýı syzyqtyq údetkish bar. Bul standartty IMRT/VMAT-tan bastap stereotaksıstik jáne pedıatrııalyq hattamalarǵa deıingi barlyq ádisteme spektrin tıimdi iske asyrýǵa múmkindik beredi.
Álemde (Ispanııa, Túrkııa, Izraıl, Frantsııa, Reseı Federatsııasy) tomoterapııa qyzmetteriniń baǵalaryn taldaý halyqaralyq praktıkada tomoterapııa qunynyń klassıkalyq syzyqtyq údetkishterdegi sáýlelik terapııa qunynan tómen ekenin rastaıdy. Qazaqstanda tomoterapııa qyzmetterine syzyqtyq údetkishterdegi uqsas qyzmettermen salystyrǵanda bes ese joǵary tarıfter boıynsha aqy tólenedi.
Ótken jyldyń qazan aıynda Densaýlyq saqtaý mınıstrligi tomoterapııanyń tegin medıtsınalyq kómektiń kepildik berilgen kóleminiń (TMKKK) tizbesine enýin jalǵastyratynyn jáne onkologııalyq aýrýlar boıynsha emdelip jatqan barlyq patsıent tolyq kólemde em alatynyn habarlaǵan edi.