Tólem kartasy qandaı jaǵdaılarda buǵattalady
«Jaqynda meniń bank kartamdy birjaqty tártippen buǵattap tastady. Tıisinshe, men qarajat ala almadym. Keıin buǵattan shyǵardy, biraq meniń suraǵym bar. Jalpy kartany kim buǵattaı alady, eger bank qatelesken bolsa, bankti qalaı jaýapkershilikke tartýǵa bolady?», - delingen qoıylǵan saýalda.
Osy suraqqa jaýap bergen mamandar emıtent bank qaı jaǵdaılarda tólem kartochkasyn buǵattaı alatynyn túsindirdi.
Bul turǵyda buǵattaý jaılary: tólem kartochkasynyń ıesi bank menedjerine onyń joǵalǵandyǵy, urlanǵandyǵy nemese ruqsatsyz paıdalanǵandyǵy týraly habarlasa, «plastık» ustaýshy tólem kartochkasyn berý týraly shartty oryndamaıtyn bolsa, sondaı-aq taraptar arasyndaǵy shartta kózdelgen, ıaǵnı tólem kartochkasyn paıdalanýdyń ishki qujaty saqtalmasa.
«Sonymen qatar, ýákiletti memlekettik organdardyń nemese laýazymdy tulǵalardyń ókimderi negizinde shyǵys operatsııalaryn júrgizýge shekteý salynýy múmkin. Mysaly, salyq tólemeý, tergeý jumystaryn júrgizý kezinde, alaıaqtyq operatsııalarǵa jáne basqalaryna kúmándi bolǵan kezde. Atap aıtqanda, tólem kartochkasy boıynsha kúmándi, kúdikti operatsııalar jasalǵanda, olardyń aldyn alý úshin bankter olardyń jeke túrlerine júıelik shekteýler qoıýy múmkin. Olardy belgileý sharttary, sondaı-aq olardy alý tártibi tólem kartochkasyn shyǵarý týraly shartta kórsetilgen», - delingen habarlamada.
Munymen qosa, QR Qarjy mınıstrligi Qarjy monıtorıngi komıtetiniń terrorızm men ekstremızmdi qarjylandyrýmen baılanysty uıymdar men tulǵalar tizbesine engizilgen uıymdar men jeke tulǵalar týraly aqparaty da shekteýlerge negiz bola alady.
«Qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl týraly» QR Zańynyń normalarynda bankter mundaı faktilerdiń aldyn alý jáne jolyn kesý úshin operatsııa kúdikti dep tanylǵan kezde ony oryndaý aldynda QR QM QMK-ke dereý habarlaýǵa mindetti ekendigi aıqyndalǵan.
Bul rette, eger banktiń klıentteri – uıym nemese jeke tulǵa terrorızm men ekstremızmdi qarjylandyrýmen baılanysty uıymdar men tulǵalar tizbesine engizilse, bankter ózderiniń banktik shottaryndaǵy shyǵys operatsııalardy dereý toqtatýǵa mindetti.
Tyıym salýdy sottar sot aktileriniń negizinde jáne sot oryndaýshylary prokýror sanktsııalaǵan sot oryndaýshylarynyń qaýlylary negizinde eldiń qylmystyq-protsestik zańnamasynda ári Atqarýshylyq is júrgizý týraly zańda kózdelgen tártippen salady.
«Eger buǵattaý negizsiz bolsa, siz QR Qarjy naryǵyn retteý jáne damytý agenttigine óz quqyqtaryńyzdy qorǵaý týraly ótinish berýge quqyǵyńyz bar», - dep atalyp ótken agenttik málimetinde.
Aıta keteıik, QR Qarjy naryǵyn retteý jáne damytý agenttigi 2020 jylǵy 25 maýsymnan bastap «Fingramota Online» mobıldi qosymshany iske qosty. Bul qarjy retteýshisiniń halyqpen jáne bıznespen ózara is-áreketiniń yńǵaıly quraly.
