Tólebı aýdanynda selden zardap shekken turǵyndar baspanaly boldy

TÓLEBI. QazAqparat – QR Konstıtýtsııasy kúni qarsańynda Tólebı aýdanyndaǵy úılerin tasqyn sý basqan 42 otbasyna jańa úılerdiń kilti tapsyryldy, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.

Turǵyndardyń qýanyshymen bólisken óńir basshysy Ómirzaq Shókeev birneshe úıdi aralap shyǵyp, baspana ıelerin jańa qonysymen quttyqtady.

«Búgin mine, jańa úıge qonys aýdaryp, qonys toıyn jasap jatyrsyzdar. Erte kóktemde bolǵan tabıǵı apat ábigerge salyp, biraz qıyndyq týǵyzǵan bolatyn. Onyń bári artta qalyp, ózderińiz tabaldyryǵyn jańa attaǵan baspanalaryńyz berekeli, qydyr qonǵan úlken úıge aınalsyn degim keledi»,- dedi oblys ákimi.

Bıyl kóktemde qatty jaýyn-shashyn saldarynan sý arnalary tasyp, Tólebıde sel oryn alǵan bolatyn. Saldarynan birneshe úıdi sý basyp, zaqymdandy. Oblys ákimi Ómirzaq Shókeevtiń tapsyrmasyna sáıkes, shuǵyl shtab qurylyp, aýdandaǵy 42 úı jaramsyz dep tanyldy. Jańa baspanalardyń qurylysy qarqyndy júrgizildi. Aıta keterligi, atalǵan baspanalardyń 17-si – Leńgir qalasynda, 2-i – Kıelitas, 22-si – Sultan-Rabat, 1-i – Yntymaq aýyldarynda turǵyzyldy. Baspanalardyń jalpy aýmaǵy – 2640 sharshy metr. Qurylysty 9 merdiger mekeme júrgizdi.

Nóser jaýynnyń saldarynan sý tasqyny kezinde úıler men joldardy sý basyp, Joǵary Qasqasý eldi mekenindegi «Qasqasý» ózeni boıynda ornalasqan 4 kópirdi de sý shaıyp ketken edi. Turǵyndardyń aýyl arasynda qatynaýlary úshin ótkelder eki táýliktiń ishinde tolyǵymen qaıta qalpyna keltirilgen. Tıisti qarajat bólinip, jaramsyz kúıge túsken úsh kópirdiń qurylysy tolyq aıaqtaldy.