Tolassyz jańbyrdan keıin Izmırdegi birneshe aýdandy sý basty

ASTANA.KAZINFORM - Nóser jaýyn Túrkııanyń batysy men ońtústik-batysynda keń taralǵan sý tasqynyna sebep boldy, dep habarlaıdy Kazinform agenttiginiń menshikti tilshisi. 

Túrkııanyń apattardyń aldyn alý jáne basqarý basqarmasynyń (AFAD) málimeti boıynsha, Izmır provıntsııasy, ásirese jaǵalaýdaǵy Focha aýdany qatty zardap shekti.

Nóser jańbyrdan teńiz deńgeıi kúrt kóterilip, jaǵalaý, joldar men turǵyn úılerdi sý basty. Keıbir aýdandarda qutqarý qyzmeti sý basqan úılerden turǵyndardy evakýatsııalap jatyr. 

Focha aýdanynda sý jaǵalaýdaǵy kafelerdi, dúkenderdi jáne jeke úılerdi basyp qaldy. Kóptegen kólik sý astynda qaldy. Jergilikti turǵyndar tolqyndardyń ǵımarattardyń qasbetterine jetkenin, al keıbir aýdandarda kólik qozǵalysy toqtatylǵanyn habarlaıdy. Aýa raıynyń qolaısyzdyǵyna baılanysty qoǵamdyq kólik qozǵalysy ýaqytsha toqtatyldy. 

Meteorologtar nóser jańbyr aldaǵy 24 saǵat boıy jalǵasady dep boljap otyr. Bılik aımaq turǵyndaryna qajet bolmasa úılerinen shyqpaýǵa jáne saqtyq sharalaryn qabyldaýǵa keńes beredi. 

Qutqarý jáne kommýnaldyq qyzmetter apat saldaryn joıý jumystaryn jalǵastyryp jatyr jáne jańbyr kúsheıse jaǵdaı budan beter nasharlaýy múmkin ekeni eskertildi.

Buǵan deıin Túrkııanyń birneshe ońtústik-batys aımaǵynda qatty ystyq pen qurǵaq aýa raıynan týyndaǵan orman órtterimen belsendi kúres júrgizilip jatqanyn habarlaǵan bolatynbyz.