Tól oıynymyz – toǵyzqumalaqtan el chempıondary anyqtaldy

ASTANA. KAZINFORM – Almaty qalasynda tól oıynymyz – toǵyzqumalaqtan erler jáne áıelder arasynda klassıkadan jekeleı Qazaqstan chempıonaty máresine jetti.

Bir aptaǵa sozylǵan tartysty doda Almaty tórinde, QR Ortalyq memlekettik murajaıynda uıymdastyryldy.

Jalpy saıysqa elimizdiń túkpir-túkpirinen 130-dan astam toǵyzqumalaqshy qatysyp, ózara myqtyny anyqtady. Bul birinshilikte Ásel Dálıeva, Ǵalymjan Temirbaev, Janat Kaımýldın syndy álem chempıondary da baq synady.

Aıta keteıik, bul chempıonat aldaǵy V Dúnıejúzilik kóshpendiler oıyndary men álem chempıonatyna irikteý saıysy retinde ótti.

Atalǵan birinshilikte erler arasynda bas júldeni qyzylordalyq Beksultan Bostandyqov jeńip alsa, ekinshi orynǵa qaraǵandylyq Asylhan Qojanásip ıe boldy. Al úzdik úshtikti Batys Qazaqstan oblysynan kelgen Darhan Anýarbekov pen astanalyq Ersultan Áýelbaı ózara bólisti.

Áıelder arasynda chempıondyq ataqqa aqtóbelik Móldir Serikqyzy ıe boldy. Ekinshi oryndy álem chempıony túrkistandyq Asel Dálıeva jeńip alsa, úshinshi oryndarǵa qyzylordalyq oıynshy Uldana Mahanbetamın men qaraǵandylyq Ańsaǵan Qojanásip qol jetkizdi.

Osylaısha jalpy esepte 1-oryndy Qyzylorda oblysy, 2-oryndy Aqtóbe oblysy, 3-oryndy Túrkistan oblysy ıelendi.