Tokıoda polıtsııa poıyz jolaýshylaryna shabýyl jasaǵan er adamdy ustady

TOKIO. Kyodo-QazAqparat – Japon polıtsııasy Tokıo aýdandarynyń birinde juma kúni poıyz jolaýshylaryna pyshaqpen shabýyl jasap, keıin belgisiz baǵytqa qashyp ketken er adamdy ustady, dep habarlaıdy QazAqparat Kyodo agenttigine silteme jasap.

Shabýyl jasaǵan jas jigittiń jergilikti táýlik boıy jumys isteıtin dúkenderdiń birinde ustalǵany habarlandy. Er adamnyń ózi dúken qyzmetkerine poıyzǵa shabýyl jasaǵanyn aıtqan, artynsha sýpermarket qyzmetkeri polıtsııa shaqyrǵan.

Buǵan deıin habarlanǵandaı, Tokıonyń Setagaıa aýdanynda «Odakıý» temirjol tarmaǵynda poıyz jolaýshylarynyń biri kenetten pyshaq alyp shyǵyp kóringenge silteı bastaǵan, artynsha aıaldamalardyń birinde júgirgen kúıi poıyzdan shyǵyp ketken.

Sońǵy málimetter boıynsha, oqıǵa saldarynan barlyǵy 10 adam zardap shekken, keıbireýleri pyshaq jaraqatyn alǵan, al keıbireýleri shabýyldaýshydan qashqan kezde qulap jaraqattaanǵan. Barlyǵy toǵyz adam aýrýhanaǵa jetkizildi. Zardap shekkenderdiń eshqaısysynyń ómirine qaýip tónip turǵan joq. Naqtylanǵan málimetter boıynsha, bir áıel aýyr jaraqat alǵan, es-tússiz halde jatyr.

Poıyzdyń barlyq jolaýshysy evakýatsııalandy, osy baǵytta qozǵalys ýaqytsha toqtatyldy. Qazirgi ýaqytta polıtsııa oqıǵanyń mán-jaıyn anyqtaýdy jalǵastyrýda. Poıyzdyń ózinen shabýyldaýshy laqtyrǵan pyshaq jáne onyń túsirip alǵan uıaly telefony tabyldy.