Toqaev Túrikmenbashy–Qarabuǵaz–Qazaqstan shekarasy jańa avtomobıl jolyn salýdy usyndy

ASTANA. QazAqparat – Qazaqstan men Túrikmenstan teńiz porttary arasyndaǵy kooperatsııany tereńdetedi. Bul týraly búgin Aqordada Túrikmenstan Prezıdenti Serdar Berdimuhamedovpen kelissózderden keıingi BAQ ókilderine arnalǵan brıfıngide Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Biz Qazaqstan-Túrikmenstan-Iran temir jolyn tolyq qýatyna shyǵarý úshin birlesken kúsh-jiger jumsaýǵa kelistik. Qalyptasqan logıstıkalyq tizbekterdiń úzilýi aıasynda bul baǵytqa suranys kúrt ósti. Sondyqtan biz atalǵan magıstraldy damytý boıynsha birlesken is-qımyl josparyn daıyndaýdy tapsyrdyq», - dedi Memleket basshysy.

QR Prezıdenti eki el de barynsha paıda alýy úshin logıstıkany jaqsartý, básekelestik tarıfter qurý, ınfraqurylymdy jańǵyrtý qajettigin aıtty.

«Aqtaý, Quryq, Túrikmenbashy teńiz porttary arasyndaǵy kooperatsııany tereńdetý máseleleri jeke talqylandy. Bul baǵyttar Qazaqstan men Túrkimenstannyń kóliktik-logıstıkalyq ózara is-qımylynyń mańyzdy baǵyty bolyp tabylady. Munda Túrikmenbashy–Qarabuǵaz–Qazaqstan shekarasy jańa avtomobıl jolynyń qurylysy úlken múmkindikter ashady. Biz sondaı-aq eki eldiń isker toptary men kásiporyndarynyń qyzmeti úshin qolaıly jaǵdaılar jasaý qajettigin atap óttik», - dedi Qasym-Jomart Toqaev.