«Toqaev qory» áleýmettik kómek kórsetedi: Jelidegi aqparat – jalǵan

NUR-SULTAN. QazAqparat - Áleýmettik jelilerde 2022 jylǵy 20 tamyzda «Q.Toqaev atyndaǵy áleýmettik qordan» áleýmettik kómek kórsetý týraly jarlyqqa qol qoıylǵany týraly málimet tarap jatyr, dep habarlaıdy QazAqparat.

Jelidegi aqparatta kómek muǵalimderge, medıtsına qyzmetkerlerine jáne memlekettik qyzmetshilerge usynylatyny jazylǵan.

Stopfake.kz saıtynyń málimetinshe, bul habarlama – jalǵan. Іs júzinde Qazaqstan Prezıdenti atyndaǵy áleýmettik qor joq. Elimizde QR Prezıdentiniń tapsyrmasy boıynsha qurylǵan, biraq onyń esimimen atalmaıtyn «Qazaqstan halqyna» qoǵamdyq áleýmettik qory bar. Qor qıyn jaǵdaıǵa tap bolǵan qazaqstandyqtarǵa qol ushyn sozady. Resmı saıt arqyly berilgen ótinish maquldanǵannan keıin ǵana muqtaj azamatqa kómek usynylady. Qor emdelýge, oqýǵa, dárilik zattardy satyp alýǵa qarjy aýdarady.
Mundaı habarlamalar – alaıaqtardyń isi, jeke derekterdi ıemdenýdiń amaly. Buǵan deıin qazaqstandyqtarǵa «Qazaqstan halqyna» qory qyzmetkerleriniń atynan qońyraýlar túsip, kómek usynylǵan bolatyn. Qor óziniń resmı saıtynda bul aqparatty joqqa shyǵardy.

«Qazaqstan halqyna» qory qarjylyq kómek kórsetpeıdi. Azamattardan qaýesetterge senbeýge jáne alaıaqtyq uıymdar tarapynan arandatýshylyqqa boı aldyrmaýǵa shaqyramyz. Qor qyzmetkerleri SMS-kod usynýdy suramaıdy. Alaıaqtarǵa eshqandaı aqparat bermeýdi jáne 1414 nómirinen kelip túsken kodtardy úshinshi tulǵalarǵa aıtpaýdy ótinemiz.
Sondaı-aq qor messendjerler arqyly vıdeo-aýdıoqońyraýlar jasamaıdy. Barlyq ótinimder tek qazaqstanhalqyna.kz saıty jáne atamekenim.kz qaıyrymdylyq uıymdarynyń biryńǵaı tizilimi arqyly ǵana qabyldanady, sol jerde paıdalanýshy óz ótinishiniń mártebesin de bile alady», – delingen «Qazaqstan halqyna» qorynyń saıtynda.

Taralǵan aqparat mátininde aıtylǵan 2022 jylǵy 20 tamyzdaǵy áleýmettik kómek boıynsha tólem jasalatyny týraly jarlyq ta joq. Akorda.kz saıtynyń «Quqyqtyq aktiler» bóliminde mundaı qujat ornalastyrylmaǵan.