Toqaev qaı óńirlerde teatr salynatynyn aıtty
QYZYLORDA. KAZINFORM – Qyzylordada jańa drama teatr men zamanaýı kitaphana ǵımaraty salynady. Bul týraly Memleket basshysy Qasym-Jomart Toqaev Qyzylorda qalasynda ótip jatqan Ulttyq quryltaıdyń V otyrysynda aıtty.
- Strategııalyq baǵdarlamanyń biri – mádenıet pen óner. Sebebi qoǵamnyń sanasy jańǵyrmasa reformalar oıdaǵydaı nátıje bermeıdi. Bul aqıqat. Sondyqtan biz rýhanııat máselelerine aıryqsha mán beremiz. Bul salada buryn-sońdy bolmaǵan aýqymdy sharýalar qolǵa alynady. Atap aıtqanda, Almaty oblysynda Qazaq drama teatry, Abaı, Aqtóbe oblystarynda teatrlar boıy kóteredi. Shymkente de Opera jáne balet teatrynyń qurylysy bastalmaq. Bıyl M.Áýezov atyndaǵy Qazaq ulttyq drama teatrynyń ashylǵanyna 100 jyl toldy. Osyǵan oraı teatr ǵımaratyna júrgizilip jatqan kúrdeli jóndeý jumysy aıaqtalmaq. N.Sats atyndaǵy orys memlekettik akademııalyq balalar men jasóspirimder teatry da jańǵyrtylady. Budan bólek, 2 jyldyń ishinde 100-den astam mádenıet oshaǵy jóndeledi, - dedi Prezıdent.
Qasym-Jomart Toqaev mýzeı isin damytý da mańyzdy mindettiń biri ekenin aıtty.
- Osy rette Qyzylordada ashylǵan jańa tarıhı ólketaný mýzeıin erekshe atap ótkim keledi. Men kúzde qalaǵa jumys saparmen kelgende mýzeıdi aralap kórdim. Zaman talabyna saı salynǵan ortalyqta mýzeı isin uıymdastyrýdyń tyń tásilderi qoldanylǵan. Bul tájirıbeni basqa oblystarǵa úlgi etýge bolady. Qyzylordada jańa drama teatr salý josparymyzda bar. Bıyl qurylysty bastaýymyz kerek. Ótken saparymda oblystyń zııaly qaýym ókilderimen kezdesken kezde zamanýı kitaphana salý kerek dep aıttym. Endi bul qurylys bıyldan bastap júrgiziledi, - dedi Memleket basshysy.
Osyǵan deıin Qasym-Jomart Toqaevtyń Qyzylorda oblysy ákiminiń jumysyn oń baǵalaǵany týraly jazdyq.