Prezıdent CITIC Group-tyń Qazaqstandaǵy jobalaryna joǵary baǵa berdi
ASTANA. KAZINFORM — Memleket basshysy CITIC Group kompanııasy dırektorlar keńesiniń tóraǵasy Sı Gohýany qabyldady, dep habarlaıdy Aqordanyń baspasóz qyzmeti.
Kezdesýde energetıka, munaı-hımııa ónerkásibi, avtojol qurylysy, mıneraldy sektor, aýyl sharýashylyǵy jáne basqa da negizgi salalardaǵy seriktestiktiń qazirgi jaı-kúıi men ony nyǵaıtý perspektıvasy talqylandy.
Qasym-Jomart Toqaev Aqtaý bıtým zaýytyn jańǵyrtý jobasyn tıimdi iske asyrǵany úshin CITIC Group kompanııasyna alǵys aıtty. Óndiris ornyndaǵy jumystar bıyl sáýir aıynda merziminen buryn aıaqtaldy. Sondaı-aq Prezıdent Qazaqstannyń senimdi ınvestıtsııalyq seriktesi retinde CITIC Group kompanııasynyń qyzmetine joǵary baǵa berdi. Qazaqstan men Qytaı arasyndaǵy iskerlik baılanysty nyǵaıtý boıynsha belsendi jumys júrgizýdiń mańyzyn atap ótti.
Al Sı Gohýa korporatsııanyń munaı óńdeý zaýyttaryn jańǵyrtý, munaı qubyrlaryn tartý, Ortalyq – Batys avtokólik jolyn jóndeý, astyqty tereń óńdeý jobalaryn birlesip júzege asyrýǵa nıetti ekenin jetkizdi.
Buǵan deıin Prezıdent TMU-ǵa múshe elderdiń ortalyq bankteri ókilderiniń keńesine qatysqanyn jazdyq.