Toqaev BUU-ny reformalaýǵa qatysty paıymymen bólisti
ASTANA. KAZINFORM – Prezıdent Qasym-Jomart Toqaev Al Jazeera telearnasyna bergen eksklıýzıv suhbatynda Birikken Ulttar uıymyn reformalaýǵa qatysty paıymymen bólisti.
Al Jazeera: BUU-da naqty neniń ózgergenin qalaısyz? BUU Qaýipsizdik Keńesine nemese veto quqyǵyn paıdalaný tetigine qatysty ne aıtasyz?
– Eń aldymen, Qaýipsizdik Keńesin keńeıtý qajet. Damýshy memleketter, múmkin rotatsııa negizinde, Birikken Ulttar Uıymynyń osynaý negizgi organyna múshe bolýy kerek. Degenmen Japonııa, Germanııa syndy iri derjavalar, sonymen qatar Azııa men Afrıkadan shyqqan ózge de elder Qaýipsizdik Keńesine kirýi tıis nemese qandaı da bir jolmen onyń jumysyna aralasýy qajet. Bul problemanyń ádil sheshimi bolar edi.
Siz qazir ǵana keıbir iri memleketterdiń nemese derjavalardyń oqshaýlanýyn eske salǵan edińiz. Iá, mundaı jaıt oryn alyp jatyr. Biz buǵan alańdaýshylyqpen qaraımyz.
Al Jazeera: Kóptegen el ondaǵan jyldar boıy Siz aıtyp otyrǵandaı BUU-nyń basty ınstıtýttaryn reformalaýǵa úndep keledi. Qazaqstan ózge elderdiń qolynan kelmegen isti qalaı júzege asyra alady? Qazaqstannyń negizgi taýarlarǵa qoljetimdiligi, asa mańyzdy shıkizattardy tasymaldaýy elińizge basymdyq bere me? Qalaı oılaısyz?
– Iá, qandaı da bir deńgeıge deıin biz yqpal etý tetikterin paıdalanatyn bolamyz. Qazaqstan Birikken Ulttar Uıymyna qatysty bizdiń qyzmetimizde qoldanýǵa bolatyn sırek kezdesetin metaldardyń jáne basqa da tabıǵı resýrstardyń qomaqty qoryna ıe el. Biraq biz BUU-ny reformalaýǵa qatysty áńgimede asyra siltemeımiz ári shamamyzdy artyq baǵalamaımyz.
BUU-ny barynsha ádil, qazirgi zamannyń talaptaryna múmkindiginshe jaýap beretindeı jasaý úshin eń birinshi kezekte barlyq memleket, ózińiz aıtqandaı orta derjavalar kúsh-jiger biriktirýi tıis dep sanaımyz.
Eske sala keteıik, buǵan deıin Prezıdent munaı tasymaldaýdyń balama baǵyttaryna qatysty saýalǵa jaýap bergen bolatyn.