Toqaev Abaıdyń «Adamzattyń bárin súı baýyrym» degeni neni meńzeıtindigin aıtty

NUR-SULTAN. QazAqparat – Azııa birige alady. Bul týraly búgin elordada ótip jatqan Azııa elderi qalamgerleriniń tuńǵysh forýmynda Qazaqstan Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Azııa bir kezderi aıyrylyp qala jazdaǵan mádenı, tarıhı qatynastaryn qalpyna keltirýde. 20 ǵasyrda 2 júıeniń teketiresi Azııany da ekige bólip, tutas mádenıetter arasyna syzat túsirdi. Ortalyq Azııa temir qursaýǵa alyndy. Halyqtar men memleketter qaq jaryldy. Alaıda, biz bárimizge ortaq, bastaýy bir qundylyqtarymyzdy saqtap qaldyq. Jasandy kedergiler joıylǵan soń biz birtutas álem ekenimizdi qaıta sezindik», - dedi QR Prezıdenti.

Memleket basshysy otbasylyq jáne qoǵamdyq dástúrler, eńbekqorlyq pen bilimge umtylý Azııa halyqtaryna tán asyl qasıetter ekendigin basa aıtty.

«Mádenıetterdiń jarasymdy damýyn bir sózben áralýandyq úılesimi dep túsiný qajet. Uly Abaıdyń «Adamzattyń bárin súı baýyrym dep» aıtqany osyny meńzeıdi. Azııa birige alady. Qaıta jańǵyrǵan Uly Jibek joly osynyń dáleli»,- dedi Q.Toqaev.

Bul rette Qazaqstan Prezıdenti qalamgerlerdiń eńbegi Azııanyń uly mádenıetin jańǵyrtý isine eleýli úles qosyp kele jatqanyn aıtty.

«Eýrazııa júregindegi qazaq dalasy Batys pen Shyǵysty jalǵaıtyn dáliz ǵana emes. Uly dala eli san taraptaǵy ǵylym men bilimniń, órkenıetterdiń toǵysqan tusy. Búgingi forým qazirgi zaman úrdisteriniń adam áleýetin damytýǵa qyzmet etetindigin kórsetip otyr. Rýhanı kemeldenýge umtylmaı órkendeý bolmaıdy. Ondaı damýdyń eshqandaı mańyzy joq», - dedi Qasym-Jomart Toqaev.

Eske salsaq, elordada Azııa qalamgerleriniń І forýmy ótip jatyr. Oǵan ádebıet boıynsha Nobel syılyǵynyń 3 nomınaty qatysýda. Jıynda Qasym-Jomart Toqaev «Azııa alyby» halyqaralyq ádebı syılyǵyn taǵaıyndaýdy usyndy.