Tobylda jylý men sýdyń tarıfi arzandady

Qostanaı oblysy Beıimbet Maılın aýdany prokýratýrasynyń qadaǵalaý aktisi boıynsha monopolııaǵa qarsy organ Tobyl kentiniń turǵyndaryna jańa tarıf engizýge qol jetkizdi. «Tobyl» MKK jylýmen, sýmen jabdyqtaý jáne sý burý tarıfin arzandatatyn boldy, dep habarlaıdy QazAqparat Bas prokýratýraǵa silteme jasap. 

Atap aıtqanda, «Tobyldyń» tarıftik smetany oryndamaı, 2022 jylǵa 79 mln teńge mólsherinde amortızatsııalyq aýdarym qarajatyn maqsatsyz paıdalanǵany anyqtaldy.

Turǵyndarǵa kelgen zalaldy óteý maqsatynda «Tobyl» 1 qazannan bastap tarıfti 4 547,33 teńgeden 3 655,60 teńgege deıin, al kásipkerler úshin 5 784,14 teńgeden 4 649,87 teńgege deıin tómendetetin boldy.

Sondaı-aq sýmen jabdyqtaý tarıfi 524,95 teńgeden 408,19 teńgege deıin jáne sý burýǵa 266,08 teńgeden 234,84 teńgege deıin arzandaıdy. 

Osylaısha Tobyl kentiniń 2 myńnan astam abonentiniń, onyń ishinde 87 kásipkerdiń quqyǵy qorǵaldy.