TMU elderi «aqyldy» jáne «jasyl» qalalardy damytýǵa ýaǵdalasty
ASTANA. KAZINFORM – Qujat qala qurylysy, sáýlet, turǵyn úı saıasaty jáne turaqty qalalyq damý salalaryndaǵy yntymaqtastyqty damytýǵa baǵyttalǵan. Bul týraly Ónerkásip jáne qurylys mınıstrliginiń baspasóz qyzmeti habarlady.
Bakýde UN-Habitat baǵdarlamasynyń qoldaýymen ótken WUF-13 Dúnıejúzilik qalalar forýmy aıasynda Qazaqstan Respýblıkasy Ónerkásip jáne qurylys vıtse-mınıstri Rahymjan Isaqulov Túrki memleketteri uıymyna (TMU) múshe elder arasynda Qala qurylysy, aýmaqtyq josparlaý jáne turaqty qalalyq damý salasyndaǵy ózara túsinistik týraly memorandýmǵa qol qoıý rásimine qatysty.
Qujat qala qurylysy, sáýlet, turǵyn úı saıasaty jáne turaqty qalalyq damý salalaryndaǵy yntymaqtastyqty damytýǵa baǵyttalǵan.
Taraptar qalalardy damytý isin tsıfrlandyrý, geoaqparattyq júıelerdi (GIS), 3D-modeldeý, tsıfrlyq syńarlar men jasandy ıntellekt tehnologııalaryn engizý, «aqyldy» jáne «jasyl» qalalardy damytý, sondaı-aq energııa únemdeıtin ári ekologııalyq ınfraqurylymdy qalyptastyrý baǵyttary boıynsha ózara is-qımyldy kúsheıtýge kelisti.
Memorandýmǵa qol qoıý TMU elderiniń turaqty qalalyq damý salasyndaǵy praktıkalyq bastamalardy birlesip júzege asyrýǵa daıyn ekenin kórsetedi.
Aıta ketelik keıingi 5 jylda Túrki memleketteri uıymy (TMU) sapaly damý kezeńinen ótip, óńiraralyq yntymaqtastyqtyń jarqyn úlgisine aınalatyny týraly jazǵan edik.
