TMD ishinde Qazaqstan eń baqytty el retinde tanyldy

ASTANA. KAZINFORM – Jyl saıyn júrgiziletin Dúnıejúzilik baqyt baıandamasy (World Happiness Report) derekteri boıynsha Qazaqstan Ózbekstannan – 10, Reseıden – 13, Qyrǵyzstannan – 32 orynǵa alǵa shyǵyp, 43-shi orynǵa taban tiredi. 

Osylaısha, elimiz TMD-ǵa múshe memleketter reıtınginde eń baqytty el retinde tanylyp, kósh bastap tur.

2024 jyly Qazaqstan atalǵan tizimde 49-shy orynda bolǵan. Dúnıejúzilik baqyt baıandamasy — 140-tan astam eldiń derekteri negizinde jasalatyn jáne jyl saıyn Gallup, Birikken Ulttar Uıymy, Oksford ýnıversıteti jarııalaıtyn reıtıng.

— Baqyt deńgeıi obektıvti derekterdi — jan basyna shaqqandaǵy jalpy ishki ónim, áleýmettik qoldaý, salaýatty ómir súrý uzaqtyǵy, erkindik, jomarttyq jáne sybaılas jemqorlyqqa qarsy kózqarasty nazarǵa ala otyryp, álemdik Gallup saýalnamasy negizinde el turǵyndarynyń sýbektıvti baǵalaýyn eskeretin birneshe krıterıı boıynsha anyqtalady. Munda respondentter óz ómirine kóńili tolý deńgeıin 0-den 10-ǵa deıingi kórsetkish negizinde baǵalaıdy, — delingen qujatta. 

Aıta keteıik, Premer-mınıstr Oljas Bektenovtiń Memleket basshysy Qasym-Jomart Toqaevtyń el tizginin qolǵa alǵanyna alty jyl tolýyna oraı jýyrda jaryq kórgen maqalasynda 2019 jyldan beri el halqynyń ómir súrý uzaqtyǵy 73-ten 75 jasqa deıin artqanyn atap ótti. Jalpy, ólim-jitim — 7,8%-ǵa, analar ólimi — 26,3%-ǵa, bala ólimi — 15,8%-ǵa tómendedi.

Eske salsaq Qazaqstan kreatıvti taýarlar men qyzmetter reıtınginde 65-orynǵa shyqqan edi.