TMD-nyń alǵashqy halyqaralyq kınofestıvali Qazaqstanda ótpek

MINSK. KAZINFORM — TMD shtab-páterinde sarapshylardyń qatysýymen «Dostastyq» halyqaralyq kınofestıvalin ótkizý usynysy talqylandy, dep habarlaıdy Kazinform agenttiginiń tilshisi.

Otyrysqa uıymǵa múshe memleketter men TMD Atqarýshy komıtetiniń ókilderi qatysty. Onyń barysynda sarapshylar «Dostastyq» kınofestıvalin uıymdastyrý týraly usynysty talqylap, is-sharanyń jobasyn kelisti. Endi tıisti bastama TMD úkimet basshylary keńesiniń qaraýyna engiziledi.

Aıta keteıik, TMD aıasynda kınofestıvalder ótkizýdi Qazaqstan tarapy usynǵan bolatyn. Bul — uıymǵa múshe memleketterdiń kınematografııa salasyndaǵy yntymaqtastyǵyn nyǵaıtýǵa jáne ulttyq týyndylardy nasıhattaýǵa yqpal etpek.

Bul rette atalǵan is-sharany eki jylda bir ret kezekpen ár memlekette ótkizip turý josparlanyp otyr.

Sarapshylar otyrysynda málim bolǵandaı, TMD aıasyndaǵy alǵashqy kınofestıvaldi Qazaqstanda uıymdastyrý kózdelgen.

Eske salaıyq, taıaýda TMD shtab-páterinde sarapshylardyń qatysýymen «TMD +» formatyn qurý múmkindikteri talqylanǵan bolatyn. Bul bastamany da qazaqtandyq tarap usynǵan bolatyn.

Qosa ketsek, bıyl 28 sáýirde Ózbekstan astanasynda TMD Ekonomıkalyq keńesiniń otyrysy ótedi.