Til – dostyqtyń altyn kópiri - Mılana Tarasova
KÓKShETAÝ. QazAqparat - Til – dostyqtyń altyn kópiri, qasıetti uǵym. Ár azamat memlekettik tilin meńgerýge mindetti. Elimizdi álemge tanytý úshin tilimizdiń mártebesin kóterýge atsalysý – boryshymyz.
Bul týraly Qazaqstan halqy Aqmola assambleıasy janyndaǵy «Qoǵamdyq kelisim» MM-niń «Mámile» memlekettik tildi meńgerý klýbynyń jetekshisi Mılana Tarasova aıtty.
Búgingi kúni Mılana Kókshetaýdaǵy Sh.Ýálıhanov atyndaǵy ýnıversıtetiniń 4 kýrs stýdenti, qazaq tili men ádebıeti pániniń muǵalimi mamandyǵy boıynsha bilim alyp jatyr. Ol negizgi oqýynan bólek, oblys ortalyǵyndaǵy «Qoǵamdyq kelisim» mekemesiniń janyndaǵy Memlekettik tildi nasıhattaý jáne damytý ortalyǵynyń «Mámile» memlekettik tildi meńgerý klýbyna jetekshilik etedi. Onyń qazaq tiline degen mahabaty ómirin ózgertip, maqsatyna jetelegen.
«Jastaıymnan muǵalim bolýdy armandadym. Mektepte oqyp júrgenimde ózimniń synyptastaryma qazaq tilinen kómektesip, úırettim. Qazaq tiline degen mahabatym erekshe boldy. Sol arman men tilge degen mahabatym meni adastyrmaı, pedagogıka salasyna alyp keldi. Osy maqsatta Kókshetaýda joǵary oqý ornyna «qazaq tili men ádebıeti» mamandyǵy boıynsha oqýǵa tústim. Qazirgi kezde, ýnıversıtettegi oqýymnan bólek, «Qoǵamdyq kelisim» mekemesiniń janyndaǵy Memlekettik tildi nasıhattaý jáne damytý ortalyǵynda «Mámile» memlekettik tildi meńgerý klýbyna jetekshilik etemin. Onda ózge ult ókilderine memlekettik tilde sabaq beremin. Til – dostyqtyń altyn kópiri, qasıetti uǵym. Ár azamat memlekettik tilin meńgerýge mindetti dep esepteımin. Al elimizdi álemge tanytý úshin tilimizdiń mártebesin kóterýge atsalysý – ol bizdiń boryshymyz», - deıdi Mılana Tarasova.
«Mámile» memlekettik tildi meńgerý klýby óz jumysyn bir jyldan astam ýaqyt buryn bastaǵan, osy qysqa ýaqyttyń ishinde túrli etnos ókilderine memlekettik tildi meńgerýge kómektesip keledi. Ár aptanyń senbi kúni ótkizilip turatyn sabaqtar tildik kedergini, ekpindi joıýǵa, sózdik qoryn keńeıtýge, sóıleýdi damytýǵa yqpal etetin ártúrli jattyǵýlar men tapsyrmalardy qamtıdy. Mılananyń memlekettik tildi oqytý ádistemesi eń aldymen tyńdaýshylardyń aýyzeki sóıleýin damytýǵa, qazaq halqynyń ádep-ǵuryptaryn, salt-dástúrlerin, mentalıteti men qundylyqtar júıesin bilý prızmasy arqyly qazaq tilin úırenýge baǵyttalǵan.
«Klýb ashqandaǵy maqsatymyz – memlekettik tildi ilgeriletý, damytý, kommýnıkatıvtik daǵdylardy qalyptastyrý, til úırenýshilerdiń aýyzeki sóıleýin jetildirý. Ártúrli jastaǵy tyńdaýshylarmen ártúrli formattaǵy dıalogtar jasaımyz. Qazirgi ýaqytta 70 tyndaýshymyz bar, qazaq tilin úırengisi keletinder sany kún sanap artyp keledi. Keıbir shákirtterim jumysta jáne kúndelikti ómirde memlekettik tilde erkin sóıleýge múmkindik beretin deńgeıge jetti. Bizdiń klýbta qazaq tilinde sóıleıtinderdiń sanyn arttyrýǵa baǵyttalǵan jumys jalǵasýda, - dep qosty Mılana Anatolevna.
Osy kúni Mılananyń shákirtteri oblystyq, respýblıkalyq baıqaýlarda júlde alyp júr. Sonyń biri Maýl Gleb respýblıkalyq «Myńbulaq» baıqýynda 1-shi oryn alsa, Nadejda Sıdorovıch «Qazaqsha sóıle» aktsııasynyń jeńimpazy atandy. Al ıÝlııa Sýrovıtskaıa óńirlik qazaq tildi is-sharalarda sheshendik tanytýda.
Sonymen birge, Mılana Qazaqstan halqy Aqmola Assambleıasynyń qoǵamdyq jumystaryna da atsalysyp keledi.
Aıta ketsek, budan buryn Aqmola oblysynda mamyr merekeleri qalaı ótetinin jazǵan edik.
