Tikushaq apaty: Iran prezıdenti oqıǵaǵa deıin qaıda bardy
ASTANA. KAZINFORM – 19 mamyrda Ázerbaıjan Respýblıkasynyń Prezıdenti Ilham Álıev pen Iran Islam Respýblıkasynyń Prezıdenti Ibrahım Raısıdiń qatysýymen Araz ózeninde salynǵan «Hýdaferın» sý elektr keshenin iske qosý jáne «Gyz Galasy» GES-niń ashylý saltanaty ótti. Bul týraly Trend jazdy.
Memleket basshylary «Hýdaferın» jáne «Gyz Galasy» sý qondyrǵylaryn iske qosty.
Ázerbaıjan Respýblıkasy men Iran Islam Respýblıkasynyń memlekettik shekarasynda, Araz ózeninde salynǵan «Hýdaferın» jáne «Gyz Galasy» sý elektr keshenderi elektr qýatyn óndirý jáne sýarý maqsatynda salynǵan.
Gıdroelektr jobalary 1977 jyly qazanda Keńes Odaǵy men Iran arasynda qol qoıylǵan kelisim negizinde jasalǵan. 1990 jyldardyń basynda jobalary qaıta qaralǵan gıdroelektr keshenderiniń qurylysy Armenııanyń Ázerbaıjan aýmaǵynyń 20 paıyzyn basyp alýy nátıjesinde toqtatylǵanymen, qurylys jumystaryn keıinnen tek Iran Islam Respýblıkasy júrgizdi.
Araz ózeniniń sý resýrstaryn utymdy paıdalaný esebinen elektr energııasyn óndirýdi jáne egistik alqaptardy sýmen qamtamasyz etýdi jaqsartýǵa múmkindik beretin «Hýdaferın» jáne «Gyz Galasy» sý elektr keshenderinde bógetterdi salý jumystary aıaqtalyp, sý qoımalaryn toltyrý jumystary bastaldy.
«Hýdaferın» sý qoımasyna 503 mıllıon tekshe metr, al «Gyz Galasy» sý qoımasyna 42 mıllıon tekshe metr sý jınaldy. Bul onyń jalpy kóleminiń 40 jáne 85 paıyzy.
Eske sala keteıik, Iran prezıdenti mingen tikushaq Ázerbaıjanmen shekaralas Verzegan qalasyna jaqyn jerge apatty jaǵdaıda qondy. Keıinirek tikushaq qulaǵan jerden vıdeo paıda boldy. Adamdar prezıdent Raısı men onyń serikteriniń densaýlyǵy úshin duǵa etip jatyr.
Iran vıtse-prezıdenti Mohsen Mansýrı el prezıdenti Ibrahım Raısı mingen tikushaq apatty jaǵdaıda qonǵannan keıin qasyndaǵy eki adam birneshe ret baılanysqa shyqqanyn aıtty.
