Tyıym salynǵan dinı materıaldardy taratqan atyraýlyq 5 jylǵa sottaldy

ATYRAÝ. KAZINFORM — Atyraýda ınternet jelisinde tyıym salynǵan dinı materıaldardy taratqan azamat 5 jylǵa bas bostandyǵynan aıyryldy. 

Atyraý oblystyq polıtsııa departamenti baspasóz qyzmetiniń málimetine qaraǵanda, 2023 jylǵy maýsymda kúdiktiniń teris dinı aǵymdy nasıhattap júrgeni anyqtalǵan.

«Ekstremızmge qarsy is-qımyl basqarmasynyń qyzmetkerleri 39 jastaǵy atyraýlyq er adamnyń 2022 jyldan beri ınternet resýrstarynda terrorızmdi, dástúrli emes dindi nasıhattaıtyny anyqtaldy. Sotqa deıingi tergeý júrgizý kezinde kúdiktiniń VKontakte áleýmettik jelisinde dinı ekstremızm týraly materıaldardy ashyq jarııalap, tyıym salynǵan dinı ýaǵyzdaǵy aýdıolardy taratyp kelgen. Qazaqstan Respýblıkasynyń aýmaǵynda ınternet resýrstarda jarııalaýǵa, basyp shyǵarýǵa jáne taratýǵa tyıym salynǵan dinı ekstremıstik baspa materıaldaryn áleýmettik jeliler arqyly taratqany dáleldendi. Mundaı baspa materıaldardy 2014 jyly Qyzylorda qalalyq sotynyń jáne 2018 jyly Jetisaı aýdandyq sotynyń sheshimimen el aýmaǵynda taratýǵa tyıym salynǵan» dep habarlady departamenttiń baspasóz qyzmeti.

Atalǵan derekter boıynsha 39 jastaǵy er adam óziniń kinásin tolyqtaı moıyndaǵan. Sot sheshimimen oǵan QR Qylmystyq kodeksiniń 256-babynyń 2-bóligimen (Terrorızmdi nasıhattaý nemese terrorızm aktisin jasaýǵa jarııa túrde shaqyrý) 5 jylǵa bas bostandyǵynan aıyrý jazasy taǵaıyndaldy.

Eske sala ketelik, budan buryn sıntetıkalyq esirtki satqan 43 jastaǵy atyraýlyq 10 jylǵa sottalǵanyn jazǵan edik.