«Tıtan» batıskafy apatynyń sebebi anyqtaldy
ASTANA. KAZINFORM — Injenerlik ázirleý kezinde jiberilgen qate eksperımenttik batıskaftyń apatyna soqtyryp, saldarynan «Tıtanık» synyqtaryna barar jolda bes adam qaza tapty, dep habarlaıdy CNN.
AQSh Kóliktegi qaýipsizdik jónindegi ulttyq keńesiniń (NTSB) esebinde Titan batıskafyn jobalaý kezinde ketken ınjenerlik qatelikter «beriktik pen senimdilikke qoıylatyn talaptarǵa saı kelmeıtin, kóptegen konstrýktsııalyq aqaýlary bar kómirtek talshyǵynan jasalǵan germetıkalyq kameranyń paıda bolýyna ákelgeni» atap ótilgen.
Sondaı-aq sý astyndaǵy kemeniń ıesi OceanGate kompanııasynyń sý astyndaǵy qurylǵyny tıisti synaqtan ótkizbegeni jáne onyń naqty beriktigi týraly senimdi aqparaty bolmaǵany atap ótildi.
Budan basqa, baıandamada eger OceanGate tótenshe jaǵdaılarǵa qarsy áreket etýdiń ornatylǵan hattamalaryn oryndaǵan jaǵdaıda batıskafty erterek tabý múmkin bolǵany aıtylǵan. Bul «osy jaǵdaıda ekıpajdy qutqarý múmkin bolmasa da, ýaqyt pen resýrstardy únemdeýge múmkindik bereti edi».
NTSB esebi AQSh jaǵalaý kúzetiniń tamyz aıynda jarııalanǵan baıandamasyna uqsas bolyp otyr. Onda Titan ımplozııasyn aldyn alýǵa bolatyny aıtylǵan.
Jaǵalaý kúzetiniń málimetinshe, Vashıngtonda ornalasqan OceanGate kompanııasynda qaýipsizdikti qamtamasyz etý protsedýralary «óte laıyqsyz» bolǵan, al jarııalanǵan qaýipsizdik sharalary men naqty áreketter arasynda «sáıkessizdikter» baıqalǵan.
OceanGate kompanııasy óz jumysyn 2023 jyldyń shildesinde toqtatty. NTSB óz esebinde AQSh Jaǵalaý kúzetine adam turýǵa arnalǵan batıskaftar men basqa da germetıkalyq apparattardy zertteý úshin sarapshylyq komıtet qurýdy usynyp otyr. Sondaı-aq osy zertteý qorytyndylaryna negizdelgen tıisti normatıvtik talaptar ázirleý jáne engizý usynyldy.
Eske sala ketsek, 2023 jyldyń maýsymynda shaǵyn súńgýir qaıyqpen «Tıtanıkke» attanǵan 5 adam joǵalyp ketti.
Bortynda 5 adam (Frantsııa, AQSh, Ulybrıtanııa jáne Pákistan azamattary) bar shaǵyn «Tıtan» (Titan Sub) qaıyǵy Soltústik Atlantıkadaǵy sýǵa batqan «Tıtanık» kemesimen tanysý úshin 4 myń metr tereńdikke súńgip ketken.
«Tıtan» batıskafynda qaza tapqan pákistandyq-brıtandyq kásipker ósıetiniń joqtyǵynan áıeli men balasyna orasan baılyǵynyń az ǵana bóligin qaldyrǵanyn jazǵan bolatynbyz.
Bıylǵy aqpan aıynda AQSh «Tıtan» batıskafynyń sý astyndaǵy jarylysynyń aýdıojazbasyn jarııalady.
Tamyz aıynda AQSh «Tıtan» batıskafy apatynyń sebepterin atady.