Tımýr Súleımenov AEF-tiń birinshi kúnin qorytyndylady
«Búgin óte mańyzdy kún boldy. Astana ekonomıkalyq forýmy resmı bastaldy. Aldymen statıstıkadan bastasam, 6120 qatysýshy boldy, onyń 1147-si shetelden. Olar 111 eldiń ókili. Shamamen 1 myń BAQ ókili, onyń ishinde 120 sheteldik jýrnalıst. QR Prezıdentiniń qatysýymen jalpy sessııa, Sammıttiń jahandyq syn-tegeýrinder sharasy tabysty ótti. Memleket basshysy óz sózinde 5 iri syn-tegeýiringe jan-jaqty toqtaldy», - dep atap ótti mınıstr birinshi kúnniń qorytyndysyna arnalǵan brıfıngte.
Onyń atap ótýinshe, Qazaqstan Prezıdenti eń aldymen tsıfrlandyrýǵa toqtalyp, 2030 jylǵa qaraı álemdik JІÓ-niń 15 paıyzyn jasandy ıntellekt beretindigin aıtqan. Ekinshi syn-tegeýirin retinde energetıkalyq revolıýtsııaǵa, álemniń taza energııaǵa qaraı ilgerleýin ataǵan. Elbasynyń málimetinshe, sońǵy 30 jylda JEK-ti paıdalaný 13 esege ulǵaıyp, kún panelderiniń quny sońǵy 5 jylda 2 esege tómendegen. Úshinshi syn-tegeýirin - uzaq ómir. Búkil álemde ómir súrýdiń kútiletin uzaqtyǵy sońǵy 70 jyldyń ishinde 48-den 71 jasqa deıin uzarǵan. 2050 jylǵa qaraı 10 mlrd jer turǵynyn qamtamasyz etý úshin azyq-túlik shyǵarý kólemin búgingiden 60 paıyzǵa arttyrý kerek. Tórtinshi syn-tegeýirin - ýrbanızatsııa qarqyny. BUU málimetinshe, 2050 jylǵa qaraı qalada turatyn adamdar úlesi 70 paıyzǵa jetedi. Besinshi syn-tegeýrin - bul álemdik eńbek naryǵyndaǵy úrdis.
«Sonymen qatar, biz óte qyzyqty praktıkterdiń, saıasatkerler men ǵalymdardyń pikirlerin tyńdadyq. Adammen salystyrǵanda jasandy ıntellektiniń múmkinshilikterine qatysty ómirlik mysaldar keltirildi», - dep atap ótti Tımýr Súleımenov.
Ol AEF-tiń jalpy otyrysynda Mıtıo Kaký, Stıv Voznıak, Dzın Lıtsıýn, Djım O'Nıl tuşymdy pikirler aıtqanyn atap ótti.
