Tımýr Bekmambetov Denıs Tenniń kınojobasyn ekranǵa shyǵarmaq

MÁSKEÝ. QazAqparat - Rejısser jáne prodıýser Tımýr Bekmambetov beısenbi kúni qaza tapqan qazaqstandyq mánerlep syrǵanaýshy, Sochıde ótken Olımpıada oıyndarynyń qola júldegeri Denıs Tenniń oılastyrǵan jobasyn júzege asyrýdy josparlap otyr, dep habarlaıdy TASS agenttigi.

Denıs Ten 13 shilde kúni Máskeýde Bekmambetov pen Bazelevs kompanııasy uıymdastyrǵan Screenlife Project halyqaralyq baıqaýynyń pıtchınginde bolashaq kınojobasyn tanystyrǵan bolatyn. Sportshynyń jobasy qulaǵy estimeıtin qyz ben mylqaý jigittiń arasyndaǵy sezimge arnalǵan.

Syrǵanaýshy áleýmettik jelilerdegi paraqshalarynda fılmniń jobasy týraly udaıy jazyp turǵan. Qoldanýshylar Bazelevs negizin salýshy T. Bekmametovke fılmdi ekranǵa shyǵarý týraly usynys tastady.

«Bul - óte aýyr jaǵdaı. Denıstiń týǵan-týystaryna qaıǵyryp, kóńil aıtamyn. Biz mindetti túrde onyń ıdeıasyn jaryqqa shyǵarýǵa tyrysamyz, talantty tulǵanyń rýhy úshin arnaý-fılmdi kórsetemiz. Denıs Ten nebári 25 jasynda úlken jetistikterge jetip úlgerdi, aldyǵa qoıǵan josparlary da kóp boldy. Olardy qalaı da oryndar edi. Sebebi ol óte eńbekqor jan bolatyn», - dedi Bekmambetov.

Aıta keteıik, 19 shilde kúni Almatyda Qazaqstanǵa tanymal sportshylardyń biri Denıs Ten jambasynan pyshaqtan jaraqat aldy. Dárigerler qanshama arpalysqanymen onyń ómirin aman alyp qala almady. Denıs Tenniń qazasy búkil Qazaqstandi dúrliktirgen qaıǵyly oqıǵa boldy. Elbasy tanymal sportshynyń otbasyna kóńil aıtty.