Tımýr Ábilqasymov jańa qyzmetke taǵaıyndaldy
ASTANA. KAZINFORM – Tımýr Ábilqasymov Qazaqstan Respýblıkasynyń Qarjy naryǵyn retteý jáne damytý agenttigi tóraǵasynyń birinshi orynbasary bolyp taǵaıyndaldy. Bul týraly Aqorda málim etti.
— Memleket basshysynyń ókimimen Tımýr Bókeıhanuly Ábilqasymov Qazaqstan Respýblıkasynyń Qarjy naryǵyn retteý jáne damytý agenttigi Tóraǵasynyń birinshi orynbasary bolyp taǵaıyndaldy, ol burynǵy atqarǵan laýazymynan bosatyldy, — delingen habarlamada.
Tımýr Ábilqasymov 2011 jyly Qazaqstan menedjment, ekonomıka jáne boljaý ınstıtýtyn «bıznes ekonomıkasy» jáne «memlekettik saıasat ekonomıkasy» mamandyqtary boıynsha bitirdi. London bıznes jáne qarjy mektebinde «táýekel-menedjment» mamandyǵy boıynsha MVA dárejesin alǵan.
Táýekelderdi basqarý jónindegi kásibı mamandardyń jahandyq qaýymdastyǵy (Financial Risk Manager) halyqaralyq sertıfıkatynyń ıegeri. Budan basqa, Tımýr Ábilqasymovtyń operatsııalyq táýekelder, Bazel III jáne Data science boıynsha sertıfıkattary bar. Sondaı-aq ol «Qaztemirtrans» AQ jáne «Kazakhstan Energy Reinsurance Company» dırektorlar keńesiniń múshesi laýazymyn atqarǵany belgili.
M.Nárikbaev atyndaǵy QazMZÝ-da aǵa oqytýshy bolyp jumys istedi.
Tımýr Ábilqasymov «Radius Advisory Lab» JShÁ konsaltıngtik kompanııasynyń áriptesi laýazymyn atqardy, onda ol Qazaqstannyń jáne Ózbekstannyń kommertsııalyq bankterine jáne iri holdıngterine táýekelderdi basqarý, korporatıvtik basqarý jáne HQES standarttaryn engizý júıelerin jetildirý máseleleri boıynsha konsýltatsııa berdi.
Kvazımemlekettik sektor kompanııalarynda jáne EDB-da jumys istedi, QR Parlamenti Senatynyń janyndaǵy Jas sarapshylar klýbynyń múshesi.
Qarjy naryǵyn retteý jáne damytý agenttigi tóraǵasy Mádına Ábilqasymovanyń keńesshisi boldy.
Al Memleket basshysynyń ókimimen Nurlan Almasuly Ábdirahmanov Qazaqstan Respýblıkasynyń Qarjy naryǵyn retteý jáne damytý agenttigi Tóraǵasynyń birinshi orynbasary laýazymynan bosatyldy.
Eske sala keteıik, buǵan deıin Erbolat Sadyrbaev Tótenshe jaǵdaılar vıtse-mınıstri bolyp taǵaıyndalǵanyn jazǵan edik.