Tilder kúni: Aqmola oblysynda memlekettik til boıynsha 2 myńǵa jýyq is-shara ótedi
«Qazaqstan halqy tilderi kúni merekesine oraı túrli formattaǵy kópshilik sharalardy onlaın túrde ótkizý bıyl da josparlanǵan. Bıylǵy jylǵy til merekesiniń ereksheligi – barlyq sharalar el Táýelsizdiginiń 30 jyldyǵyna arnalyp otyr.
Búgin «merekeniń ashylýy», ıaǵnı barlyq memlekettik organdarda, eńbek ujymdarynda, vedomstvoǵa qarasty mekemelerde Qazaqstan halqy tilderi kúni merekesiniń saltanatty ashylýy uıymdastyrylýda.
Sonymen qatar barlyq memlekettik organdarda, eńbek ujymdarynda, memlekettik tildi nasıhattaıtyn sharalar, ıaǵnı baıqaýlar, saıystar, aktsııalar, forýmdar, aqyndar músháırasy, kórmeler, dóńgelek ústelder, beınebaıqaýlar saıysy, onlaın sharalar, sondaı-aq tanymdyq dárister ótkizilmekshi. Jalpy Aqmola oblysy boıynsha barlyǵy 2000-ǵa jýyq shara ótkiziledi dep kútilýde», - dedi Altynaı Ámirenova.
Basqarma basshysynyń aıtýynsha, qazirgi ýaqytta elimizde memlekettik til saıasaty qoǵamnyń talaptaryna saı júıeli júrgizilip otyr.
«Eldegi barlyq azamattardyń múddelerin kemsitpeıtin ustamdy da syndarly til saıasatyn durys jolǵa qoıýǵa basa kóńil bólinedi. Týra osyndaı baǵyttaǵy til saıasaty árkez óz jemisin berip, el birligi men tatýlyǵyna syzat túsirmesten, memleketimizdiń nyǵaıýyna, qoǵamymyzdyń toptasýyna qaltqysyz qyzmet etip keledi. Árıne, buǵan únemi jetildirilip otyrǵan quqyqtyq tetikter men naqty aýqymdy is-sharalar arqyly qol jetkizdik. Aqmola oblysy boıynsha barlyǵy 19 ortalyq bar, onyń ishinde 1 - oblystyq, 16 - aýdandyq, 2 - qalalyq ortalyq. Ortalyqtyń basty maqsaty - eresekterge «Qaztest» júıesin qoldana otyryp, memlekettik tildi meńgergen eresek turǵyndardyń úlesin arttyrý. Bıylǵy oqý jylyn 379 topta 3584 tyńdaýshy aıaqtady. Memlekettik tilde 1406 tyńdaýshy, aǵylshyn tilinen 487 tyńdaýshy sertıfıkat aldy», - dedi basqarma basshysy.
