Til komıteti jarnamalardyń saýatty jazylýyn qatań baqylamaq
Memleket basshysy Qasym-Jomart Toqaev qazaq tiliniń memlekettik til retindegi róli kúsheıip, ultaralyq qatynas tiline aınalatyn kezeńi keletinin aıtqan bolatyn. QR Mádenıet jáne sport mınstrligi Til saıasaty komıtetiniń tóraǵasy Ádilbek Qaba til janashyrlarymen kezdesý ótkizip, qoǵamda til máselesin kóterip júrgen azamattardyń únin tyńdaý, qazaq tilin eldegi ult aralyq qatynas tiline aınaldyrý baǵytyndaǵy usynystaryn talqylaý, sheshý joldaryn aıqyndady. Sharaǵa Parlamenti Senaty men Májilisi depýtattary, Prezıdent Ákimshiligi Іshki saıasat bóliminiń ókili, belgili qoǵam qaıratkerleri, til janashyrlary, saıasattanýshylar men zańgerler, múddeli mınıstrlikterdiń ókilderi qatysty. Jıyn qorytyndysy boıynsha «Til qorǵany» onlaın toby quryldy.
«Bizdiń bastamamyzben Almaty telearnasynan «Til qorǵany» aptalyq baǵdarlamasy iske qosylady. Ol aldaǵy aptadan bastap kórermenderge jol tartady. Memlekettik tilde saýatsyz jazylǵan jarnama, mekeme ataýlary, aqparattyq jadynama, nusqaýlyqty áshkereleý kerek. Til mamandarymen birigip, qateniń qaıta túzetilip, jazylǵanyn qadaǵalaǵan jón. Jobanyń basty ıdeıasy – saýatsyz jazylǵan aqparatty birden taýyp, qaladaǵy barlyq jazýlardyń qatesiz bolýyna qol jetkizý. Jobanyń mindeti – saýatsyz jazylǵan ataý nemese jarnamany kórsetý, mekeme ıesin taýyp, onyń túzetilýine muryndyq bolý. Alǵashqy túsirilim Almaty qalasynda ótti. Mundaı túsirilimder barlyq aımaqty qamtıdy», - dedi onlaın jıynda Ádilbek Qaba.
Onyń aıtýynsha memlekettik til normalaryna sáıkes keletin kórneki aqparatty qamtý dárejesin 70%-ǵa jetkizýdiń bir tetigi retinde baǵdarlamaǵa tanymal tulǵalardy tarta otyryp, telearnalar arqyly syrtqy kórneki jarnama mátinderinde, resmı qujattar men jarııalanymdarda, oqýlyqtarda, BAQ-ta memlekettik tildiń saýatsyz, orynsyz qoldanylýy týraly málimetterdiń jarııa etilýin uıymdastyrý kózdelgen. Sondaı-aq, kórneki aqparat pen jarnamanyń saýattylyǵyn qoǵamdyq baqylaý boıynsha platformany uıymdastyrý jáne sharalar qabyldaý josparda bar.
