Tıbette kóshpeliler mádenıetin áıgileıtin erekshe shaıhana ashyldy
ASTANA. KAZINFORM – Qytaıdyń Tıbet avtonomııalyq ólkesiniń Naký qalasynda kóshpeliler mádenıetin áıgileıtin «Shopan qazynasy» atty erekshe shaıhana ashyldy, dep habarlaıdy qytaılyq «Halyq gazeti».
1 200 sharshy metrlik erekshe stıldegi shaıhanany halyqtyq salt-dástúrmen sheber baılanystyrǵan. Bul jerge kelgen qonaqtar shaı iship, ártúrli dámdi astarmen tamaqtanyp, tıbet kóshpeli mádenıetiniń ereksheligin sezine alady.
Shaıhananyń aınalasy men dálizderine jergilikti halyqtyń ulttyq muraǵattarynyń 700-den astam túrinen 3 000-nan astam buıym qoıylǵan.
Onyń ishinde jas tólderge sút beretin múıizden jasalǵan bótelkeler, sirińke qorabynyń kólemindeı sary maı salatyn qalyptar, qumnan, shańnan jáne kóz qaryqtyratyn qardan qorǵaıtyn qodas júninen jasalǵan kózildirik jáne t.b. bar.
Malshylar qoldanatyn ydys-aıaqtardyń barlyq túrin de osy jerden kezdestirýge bolady.
Eske sala keteıik, buǵan deıin Tıbette shyrqalǵan «Farıda» áni 10 mln qaralym jınaǵanyn jazǵan edik.