Teılor Svıftke arnalǵan keshte úsh balany óltirgen kúdikti sot aldynda jaýap berdi
ASTANA. KAZINFORM—17 jastaǵy jasóspirimge Saýtporttaǵy bı sabaǵynda úsh qyzdy óltirdi degen aıyp taǵyldy. Dúısenbi kúni alty, jeti jáne toǵyz jasar úsh qyz Teılor Svıftke arnalǵan Hart Space is-sharasynda pyshaq shabýylynan qaza tapty. Taǵy segiz bala pyshaq jaraqatyn aldy, ekeýi aýrýhanadan shyǵaryldy, biraq bes balanyń jaǵdaıy áli aýyr. Eki eresek adam da aýyr jaraqat aldy, dep jazady VVS.
Sondaı-aq, jasóspirimge kisi óltirýge oqtalǵany úshin, sondaı-aq sýyq qarýdy zańsyz saqtaǵany úshin aıyp taǵyldy.
Beısenbi kúni kúdikti Lıverpýldiń koroldik soty aldynda jaýap berdi. Sotta onyń jeke basy týraly málimetterdi jarııalaýǵa tyıym salyndy.
Endi úsh kisi óltirdi dep aıyptalǵan 17 jastaǵy jasóspirim 2006 jyly 7 tamyzda týǵan Aksel Mýganva Rýdakýbana ekenin aıta alamyz. Kardıfte týǵan brıtan azamaty.
Shabýyl jasaý sebebi áli belgisiz.
Іs boıynsha kelesi sot otyrysy qazan aıynyń sońynda ótedi. Aıyptalýshy oǵan deıin qamaýda bolady.
Oqıǵa elde keń rezonansqa ıe boldy. Aldymen Saýtportta, sodan keıin Ulybrıtanııanyń basqa qalalarynda jappaı narazylyqqa ulasty.
Aıta keteıik, buǵan deıin Anglııada Teılor Svıftke arnalǵan keshte áldebireý balalardy pyshaqtap óltirgenin habarlaǵan bolatynbyz.
