Test tapsyryp, talantyńdy anyqtaýǵa bolady – maman keńesi

ASTANA. KAZINFORM — Arnaıy test tapsyrý arqyly óz talantyńyzdy anyqtaýǵa bolady. Nátıjesinde qandaı kásippen aınalysatynyńyzdy anyqtap, óz baǵytyńyzdy bile alasyz. Bul týraly «Búgin LIVE» baǵdarlamasyna qonaq bolǵan Berik Ásembaev aıtyp berdi.

– Meniń jumysym óte ońaı. Adamdar Klıfton ýnıversıteti daıyndaǵan testti 60 dollar tólep tapsyrady da, nátıjesinde 34 talantyn anyqtap, aldyma keledi. Al men ol adamǵa erekshelikterin aıshyqtap beremin. Bul testte 120 suraq qoıylady. Árqaısysyna jaýap berýge 20 sekýnd ýaqyt beriledi. Nege 20 sekýnd? Sebebi siz kóp oılanbaýyńyz kerek. Idealdy turǵydan jaýap berýge tyryspaý kerek. Sol kezde naqty, shynaıy jaýaby shyǵady. Bul ádis Eýropa men AQSh-ta keńinen qoldanylady. Biraq men eshkimge «Sen osyndaı maman bol, seniń osylaı istegeniń durys» dep aıtpaımyn. Tek qana «Sizdiń osy qabiletińiz kóbirek, osyndaı dúnıelerge ıkemińiz bar» dep baǵyt-baǵdar beremin, – deıdi maman.

Koýchtyń aıtýynsha, árbir adamǵa ortaq 34 talant bar. Adamdar sol talanttardyń naqty qaısysyna beıim ekenin anyqtaı alý kerek.

– Kez kelgen adam talantty. Múmkin, álemde mıllıondaǵan talanttyń túri bolar. Al Klıfton ýnıversıteti belgilegen 34 talant adamdardyń bárinde bar, bárine birdeı túsinikti talanttar. ıAǵnı, sizdiń qorshaǵan ortamen qarym-qatynasyńyzǵa baılanysty, siz múlde baıqamaǵan kúıde aqyryn damıdy. Mysaly, bizdi belgili bir qondyrǵy dep qarastyrsaq, onyń 34 batyrmasy bar. Olardyń 10-y túrli túske boıalyp, aıryqshalanyp tur. ıAǵnı bul – talanttar adamda avtomatty túrde júretin talanttar. Al qalǵandary boıymyzda bar bolsa da, sanaly túrde qosyp otyrýǵa tıisti talanttar. Men búginge deıin 200-ge jýyq adamǵa kómektestim. 20–30, tipti 40 jastaǵy adamdar meniń aldyma kelip, «Men nemen aınalysýym kerek?» dep baǵdar surap jatady, - deıdi maman.

Ol balalardyń talantyn ashý úshin ata-analarǵa da keńesin aıtty.

– Klıfton ýnıversıteti ata-analarǵa balasynyń kúshti tusyn odan ári kúsheıtýge keńes beredi. ıAǵnı adam óziniń myqty tusymen jumys isteýi kerek. Bárin birdeı jaqsartýǵa tyrysýdyń qajeti joq. Sebebi ózińniń ıkemiń kelmeıtin dúnıelerdi úırenýge kóp ýaqyt ketedi. Al óz qabiletińdi ary qaraı ashýǵa jumys isteseń, jetistikke tez jetesiń, – deıdi Berik Ásembaev.

Aıta keteıik, birneshe aı buryn Memleket basshysy ózine jalǵan psıhologter men koýchtar ústinen jıi shaǵym túsetinin aıtqan edi. 

Odan bólek, emhanalarda psıhologtar kópshilikke tegin kómek kórsetedi.