Tesla 2027 jyly adam tektes Optimus robottaryn satylymǵa shyǵarmaqshy

ASTANA. KAZINFORM — Tesla kompanııasy Optimus gýmanoıdty robottaryn 2027 jyldyń sońyna qaraı satylymǵa shyǵarýdy josparlap otyr, dep habarlaıdy TASS.

Bul týraly Tesla kompanııasynyń bas dırektory Ilon Mask Davostaǵy Dúnıejúzilik ekonomıkalyq forýmda sóılegen sózinde málimdedi. Kásipkerdiń aıtýynsha, Tesla zaýyttarynda birneshe Optimus roboty qoldanylyp, qarapaıym óndiristik tapsyrmalardy oryndap jatyr.

Mask robottardyń fýnktsıonaldyǵy osy jyldyń sońyna deıin aıtarlyqtaı keńeıtiletinin, al kelesi jyldyń sońyna deıin kompanııa ónimdi shyǵaryp, satýdy bastaýdy josparlap otyrǵanyn atap ótti.

Ilon Mask gýmanoıdty robottardy jasaý ıdeıasyn alǵash ret 2021 jyldyń tamyz aıynda jarııalady. Optimus 2024 jyldyń qazan aıynda kópshilikke tanystyryldy. Sol kezde Mask robottyń boljamdy baǵasy 20 000 dollardan 30 000 dollarǵa deıin bolady dep málimdedi, bul ony kópshilik úshin qoljetimdi etedi.

Tesla Optimus múmkindikterin 2025 jyly kórsetti: kóktemde robot bıleı alatyn ónerin kórsetse, al kúzde Gollıvýdtaǵy qyzyl kilemde júrip ótti.

Buǵan deıin Mask aldaǵy jyldary gýmanoıdty Optimus robottarynan turatyn «armııa» quryp, jylyna shamamen 1 mıllıon dana óndiristi uıymdastyratynyn málimdegen bolatyn. Odan keıin shamamen 10 mıllıon dana óndiris kólemi bar Optimus 4, sodan keıin 50-den 100 mıllıonǵa deıingi óndiristik qýaty bar Optimus 5 shyǵarylady.

Bıznesmenniń aıtýynsha, Optimus «tamasha hırýrg» bola alady, al bolashaqta barlyq jumys ornyn robottar men jasandy ıntellekt basyp alady, bul adamdardyń jumys isteýin qajet etpeıdi.