Terrorızmdi nasıhattaǵan shymkenttik 7,5 jylǵa sottaldy

ASTANA. KAZINFORM — Jyl basynan terrorıstik jáne ekstremıstik qylmystar jasaǵany úshin 60-tan astam adam qamaldy, dep habarlaıdy UQK baspasóz qyzmeti.

Bıyl maýsym men shilde aılarynda dinı radıkalızmdi qoldaýshylarǵa qatysty birqatar sot sheshimderi kúshine endi.

— Shymkent qalasynyń soty atalǵan megapolıs turǵynynyń birin terrorızmdi nasıhattaǵany úshin kináli dep tanyp, 7,5 jylǵa bas bostandyǵynan aıyrdy. UQK júrgizgen qylmystyq is sheńberinde onyń beıbit turǵyndarǵa qarsy zorlyq-zombylyqty jasaýǵa shaqyrǵany anyqtaldy. Internettegi ekstremıstik mazmunnyń áserinen radıkaldanǵan, — delingen vedomstvo habarlamasynda.

Sonymen qatar Astana soty QR aýmaǵynda terrorızmdi nasıhattaýmen jáne ekstremıstik toptarǵa adamdardy tartýmen aınalysqan sheteldik azamatty 8 jylǵa bas bostandyǵynan aıyrdy.

Jalpy jyl basynan UQK tergep-teksergen qylmystyq ister boıynsha terrorıstik jáne ekstremıstik qylmystar jasaǵany úshin 60-tan astam adam, onyń ishinde 3 sheteldik azamat túrmege qamaldy.

Budan buryn Shymkent, Atyraý men Aqtóbe turǵyndary terrorızmdi nasıhattaǵany úshin sottalǵanyn jazǵan edik.