Terrı Breton EO komıssary qyzmetinen ketti

ASTANA. KAZINFORM – Іshki naryqqa jaýapty Eýropalyq yqpaldy komıssar Terrı Breton otstavkaǵa ketti. Ol Ýrsýla fon der Lıaıen týǵan eli Frantsııaǵa onyń ornyna basqa kandıdat usyný úshin qysym jasap jatqanyn aıtty, dep jazady Euronews.

Bul týraly Breton 16 qyrkúıek, dúısenbi kúni tańerteń jarııalanǵan ashyq hatynda habarlady. 

Frantsýz azamaty aldaǵy Eýrokomıssııa quramynda mańyzdy portfolıo alady dep boljanǵan. Óıtkeni onyń vıtse-prezıdent laýazymyna taǵaıyndalýy týraly qaýeset taraǵan bolatyn. Alaıda munyń bári jalǵan bolýy múmkin. 

Bul týraly Breton Ýrsýla fon der Lıaıenge ashyq hatynda jazdy.  

«Birneshe kún buryn bolashaq Eýropalyq komıssııanyń quramy týraly kelissózderdiń sońǵy kezeńinde siz Frantsııadan jeke sebeptermen meniń atymdy alyp tastaýdy suradyńyz. Ony tipti menimen jeke talqylamadyńyz jáne Eýropa Odaǵynyń bolashaq quramyna Frantsııa úshin neǵurlym yqpaldy portfeldi usyndyńyz. Endi sizge basqa kandıdat usynylady», - dedi ol. 

Al Terrı Breton Eýrokomıssar qyzmetinen ketetinin aıtyp, áriptesterine yntymaqtastyǵy úshin alǵysyn bildirdi.

«Men óz áriptesterime, Eýropalyq komıssııa qyzmetkerlerine, Eýroparlament depýtattaryna, múshe memleketterge jáne meniń komandama sheksiz alǵysymdy bildirgim keledi. Biz birge Eýropanyń órshil kún tártibin alǵa jyljytý úshin tynymsyz jumys istedik. Men úshin jalpy eýropalyq múddelerge qyzmet etý qurmet pen mártebe boldy», - dedi Terrı Breton.