Terakt kezinde áskerı jarǵyny buzǵan ofıtserlerge úkim shyqty

AQTÓBE. QazAqparat - Aqtóbe qalasynda 5 maýsymda oryn alǵan terrorıstik  akti kezinde jarǵyny buzdy dep aıyptalǵan 6655 áskerı bóliminiń burynǵy qyzmetkerleri Qaınarbek Tastambekov pen Qaıyrǵalı Orazjanovqa sot úkim shyǵardy, dep habarlaıdy QazAqparat agenttigi.

Sottyń úkimimen Qaınarbek Tastambekovke 4,5 jylǵa bas bostandyǵynan aıyrý jazasy taǵaıyndaldy. Ol jazasyn jalpy rejımdegi kollonııada óteıtin bolady.

Al ekinshi aıyptalýshy Qaıyrǵalı Orazjanovty sot 3,5 jylǵa bas bostandyǵynan aıyrdy. Eki maıordy da sot əskerı shenderinen aıyrýǵa úkim etti.   

Aıta ketý kerek, Orazjanov  sońǵy sózinde ózine taǵylǵan aıypty tolyq moıyndap, zardap shekkenderden keshirim suraǵan bolatyn.

Toqtala ketetin jaıt, áskerılerge "Qarýly shabýyl kezinde qyzmetine nemquraıly qarady jáne áskerı jarǵyny buzdy" degen aıyp taǵylǵan bolatyn. Terrorıstik top tutqıyldan shabýyldaǵanda  ekeýi de áskerı jarǵyǵa saı áreket etpegen.  Aıyptaý materıaldarynda kórsetilgendeı, besinshi maýsym kúni Qaınarbek Tastambekov  kezekshi, al Qaıyrǵalı Orazjanov kómekshisi bolǵan.  Olar mindetterin oryndaýdyń ornyna dárethana terezesinen sekirip, qashyp ketken.  Sonyń kesirinen adamdar oqqa ushqan. Alaıda, ofıtserler ózderine taǵylǵan aıypty  moıyndamaıdy.

Esterińizge salsaq, Aqtóbede maýsymdaǵy terakt kezinde 7 adam qaza bolyp, 30-y jaraqattandy. Arnaıy operatsııa kezinde 18 terrorıstiń kózi joıylyp, toǵyzy ustalǵan bolatyn.

                                                                                                                                                                                                Zada Zeıin