Tennısten Qazaqstan jasóspirimder quramasy úzdik ondyqtyń qataryna endi
Ispanııanyń Kordova qalasynda 16 jasqa deıingiler arasynda Davis Cup Juniors Finals týrnırinde Qazaqstan jasóspirimder quramasy úzdik ondyqtyń qataryna endi, dep habarlaıdy Kazinform.
Qazaqstan tennıs federatsııasynyń málimetine súıensek, qazaqstandyq jasóspirimder komandalyq álem chempıonatyna alǵash ret qatysqanyna qaramastan barynsha tabysty óner kórsetken. Aldymen myqty quramalar jınalǵan V tobynda qazaqstandyqtar úshinshi orynǵa ıe boldy. Bul toptaǵy básekelestiktiń joǵary bolǵanyn Italııanyń fınalǵa shyqqanynan ańǵarýǵa bolady. Italııalyqtar fınaldyq kezdesýde Chehııamen altyn júldeni sarapqa salady.
Bastapqy kezdesýinde qazaqstandyqtar 2012 jylǵy álem chempıony Italııaǵa 1:2 esebimen ese jiberdi. Sodan keıin ońtústikkoreıalyqtardan 2:1 esebimen basym tústi. Sheshýshi oıynda Davis Cup Juniors jarysynyń alty dúrkin jeńimazy Ispanııaǵa jol berdi. Qorytyndy esep – 1:2.
Qosymsha týrnırde qazaqstandyqtar Perýdi 2:0 esebimen tize búktirdi. Sodan keıin ótken jylǵy álem chempıony Brazılııany 2:1 esebimen jeńdi. Búgin Qazaqstan 9-oryn úshin Argentına quramasymen talasady.
Komandalyq álem chempıonatynda el namysyn Ámir Omarhanov, Zańǵar Nurlanuly, Damır Jalǵasbaı qorǵady. Qurama kapıtany - Sergeı Kvak.
Eske sala keteıik, budan buryn Jibek Qulambaevanyń Týnıstegi jarystyń jeńimpazy atanǵanyn jazǵan bolatynbyz. Al Beıbit Juqaev 18 eıs jasap, AQSh-taǵy jarystyń fınalyna shyqty.
