Tennısten Devıs kýbogi: Qazaqstan tartysty matchta Argentınaǵa jol berdi

ASTANA. KAZINFORM – Rosarıo qalasynda Devıs kýbogi irikteý kezeńi aıasynda Qazaqstan – Argentına matchy máresine jetti.

Qos komanda arasyndaǵy básekege bar kúshtilerin shyǵarǵan argentınalyqtar sózsiz favorıt bolǵan edi.

Qazaqstannyń kóshbasshy tennısshisi Aleksandr Býblık Parıj olımpıadasynyń joldamasy úshin upaı jınaý maqsatynda Monpele týrnırine qatyssa, Beıbit Juqaev jaraqatyna baılanysty kele almady. Al Denıs Evseev kútpegen jerden aýyryp qaldy.

Sheshýshi, besinshi oıynda dúnıejúzilik reıtıngide 338-orynda turǵan Dmıtrıı Popkoǵa qarsy Argentına quramasy Tomas Martın Etcheverrıdiń ornyna álemniń 25-raketkasy Sebastıan Baesti shyǵardy.

Birinshi partııada birden breık jasaǵan argentınalyq tennısshi sol basymdylyǵyn saqtap qaldy – 6:4.

Esesine ekinshi sette D.Popko 3:0 esebimen alǵa ketti. Budan keıin S.Baes esepti teńestirgenimen, qazaqstandyq sportshy óziniń degenine jetti – 6:3.

Sheshýshi, úshinshi partııada esep 4:4 bolǵan mezette Dmıtrıı breık jasaǵanymen, qarsylasy sol boıda esepti teńestirdi. Oıyn taǵdyry taı-breıkte sheshilip, onda Popko eki matchbolyn paıdalana almady – 6:7 (6:8).

Eki saǵat 41 mınýtqa sozylǵan tartysty kezdesý barysynda Popko 3 eıspen birge 12 breık-poınttyń úsheýin óz esebine jazdy. Baes 3 eıs, 3 breıkpen (10 breık-poınt) kózge tústi. 
Osylaısha, Argentına quramasy 3:2 esebimen basym túsip, qyrkúıek aıynda ótetin Devıs kýboginiń fınaldyq kezeńine joldama aldy.

Eske sala keteıik, budan buryn Aleksandr Býblıktiń Monpele týrnıriniń jeńimpazy atanǵanyn jazǵan bolatynbyz.

Sondaı-aq tennısten Devıs kýboginde Argentınamen matchta Tımofeı Skatov ekinshi jeńisine qol jetkizdi.