Tennısten ÁCh: Qazaqstan Slovenııany jeńgenimen, kelesi kezeńge óte almady

Ispanııanyń Sevılıa qalasynda ótip jatqan Bıllı Djın Kıng kýboginiń fınaldyq kezeńinde Qazaqstan áıelder quramasy Slovenııamen synǵa tústi, dep habarlaıdy Kazinform.

Birinshi kezdesýinde Qazaqstan quramasy Aýstralııaǵa 1:2 esebimen jol bergen edi. Sondyqtan pleı-off kezeńine ótý úshin Qazaqstan úsh oıynda da jeńiske jetip, 3:0 esebin tirkeý kerek boldy. Alaıda alǵashqy oıynda-aq Anna Danılına qarsylasy Kaıa ıÝvannan (1:6, 0:6) oısyraı  jeńildi. 

ıÝlııa Pýtıntseva Tamara Zıdanshekpen sheberlik baıqasty. Munda esep 2:6, 6:2 bolǵan mezette slovenııalyq tennısshi básekeni jalǵastyrýdan bas tartty. Sóıtip jeńis ıÝlııaǵa berildi. 

Juptyq synda Anna Danılına men Jibek Qulambaeva Veronıka Erıavets — Ela Nala Mılıchti tize búktirdi — 2:6, 6:4, 10:7. 

Osylaısha, Slovenııany 2:1 esebimen jeńgenimen, óz tobynda ekinshi oryn alǵan Qazaqstan jartylaı fınalǵa óte almady. 

Eske sala keteıik, budan buryn Aleksandr Nedovesovtiń Bolgarııadaǵy týrnırdiń fınalyna shyqqanyn jazǵan bolatynbyz.