Teńiz kenishindegi ınfektsııalyq statsıonarda koronavırýsten emdelip jatqan naýqas joq
Oblystyq densaýlyq saqtaý basqarmasynyń baspasóz qyzmetinen málim etkendeı, ótken táýlikte – 22 aqpanda 12 adamnan koronavırýs ınfektsııasynyń belgisi anyqtalǵan. Naýqastar Atyraý qalasynda, Teńiz ken orny men Jylyoı aýdanynda tirkelip otyr.
«Qazir óz úıinde 380, al, ınfektsııalyq statsıonarlarda 50 naýqas emdelip jatyr. Onyń ishinde modýldik aýrýhanada – 33, aýdandardaǵy ınfektsııalyq statsıonarlarda – 14, №2 oblystyq aýrýhanada 3 patsıent oqshaýlanǵan. Teńiz ken ornyndaǵy ınfektsııalyq statsıonarǵa emdelý úshin naýqastar túsken joq», -dep habarlady basqarmanyń baspasóz qyzmeti.
Sondaı-aq, 2 360 oryndyq ınfektsııalyq statsıonarlardaǵy júkteme 2,1%-dy (50 naýqas) qurap otyr. Infektsııalyq statsıonarlardyń 106 tósek-orynǵa eseptelgen jansaqtaý bóliminde jaǵdaıy nasharlaǵan 9 naýqas emdelip jatyr. Onyń ishinde jaǵdaıy óte aýyr 2 naýqas ókpeni jasandy jeldetý apparatyna qosylǵan. Bul bólimdegi júkteme – 8,5%.
Eske sala ketelik, buǵan deıin Atyraý oblysynda ótken táýlikte koronavırýsqa shaldyqqandar tirkelmegenin jazǵan bolatynbyz.
