Teńiz kenishinde koronavırýstan emdelip jatqan naýqastar 800-den asty

ATYRAÝ. QazAqparat – «Qyzyl» aımaqqa qaıta oralǵan Atyraý oblysynyń Teńiz kenishindegi ınfektsııalyq statsıonarda emdelip jatqan naýqastar sany 800 adamnan asty, dep habarlaıdy QazAqparat.

Atyraý oblystyq densaýlyq saqtaý basqarmasynyń baspasóz qyzmetiniń málimetine súıensek, ótken táýlikte taǵy 101 adamnan koronavırýs ınfektsııasy anyqtalyp otyr.

Onyń ishinde Atyraý qalasynda 9 adamnan, Teńiz kenishinde 78 jumysshydan koronavırýs belgisi tabylǵan.

Al Jylyoı aýdanynda – 2, Qurmanǵazy aýdanynda 12 adam qaýipti indetke shaldyqqan.

«Naýqastardyń 12-sinde sımptom bar. Ótken táýlikte koronavırýs ınfektsııasynan 32 adam emdelip shyqty. Qazir 321 adam úı jaǵdaıynda emdelýde. Oblystyq ınfektsııalyq statsıonarda - 95, aýdandardaǵy statsıonarlarda - 39, Teńiz kenishindegi statsıonarda - 811 adam em qabyldap jatyr» dep málim etti basqarmanyń baspasóz qyzmetinen.

Eske sala ketelik, budan buryn Teńiz kenishinde bir táýlikte 144 jumysshydan koronavırýs anyqtalǵan bolatyn.