Teńiz kenishinde kólikterdiń astyna qus uıa salǵan: Mashınalar eki apta jumys istemeıdi

ATYRAÝ. QazAqparat – Atyraý oblysyndaǵy Teńiz kenishinde qus uıasy úsh kóliktiń jumysyn toqtatty, dep habarlaıdy QazAqparat.

Áleýmettik jelide merdiger kompanııa kólikteriniń astynan qus uıasy tabylǵany týraly vıdeo tarady.

Osyǵan baılanysty kólikterdi 14 kúnge deıin paıdalanbaý jóninde sheshim qabyldanǵan.

«Turaqta turǵan úsh kóliktiń astynan qustyń úsh uıasy tabyldy. Kompanııanyń bıoalýantúrlilikti basqarý rásimine sáıkes ornıtolog tekserý júrgizdi. Bir uıada ınkýbatsııanyń belsendi satysy bary anyqtaldy. Kólikterdiń jumysy balapandar uıadan ushyp ketkenge deıin, kem degende 14 kúnge toqtatylady», -dep habarlady «Teńizshevroıl» kompanııasynyń baspasóz qyzmeti.

Ornıtolog uıany jumyrtqa basý aıaqtalǵansha apta saıyn tekseredi. Eki uıadan qus jumyrtqasy tabylǵan joq.